SCENA QUARTA

ANDRONICO e ZANE.

ANDRONICO ‑ Or tandem el xe pur la veritae, al corpo de mi, che chi no fa so puerizia in zoventúe, el besogna farla in so vecieza. Mi a me arecordo al mio tempo, quando quele bone memorie, massime missiér Nicoleto di Aliegri e messiér Pantasileo da Bucentoro, le so magnificienzie me diseva: «Che vuol dir Andronico che ti stà cussí perso, de male voia? Che diavolo no te tròvistu una fía, a darte piasere con essa? Quando voràstu aver piaser, né bon tempo; quando non ti porà pí? Te me par un omo a no so che muodo mezo incantao. Mo tiente a mente vè: e recòrdate che in to vecieza ti farà qualche matería per amor può». Com che xe anche stao. E sí saràve squasi pí contento esser inamorao adesso che quando giera zòvene, si 'l no fosse per una cosa che purassé fiae me vasta el dessegno, ché non respondent ultima primis. Oh, diavolo, el xe una male cossa vegnir veci; tamen el me bastaràve l'anemo ancora. Basta, mo no pí; perché in efeto a no son nianche vecio in decrepitae. L'amor fa far de grande cosse Aldí a che modo ho menao via stà mamola e tolta da so marí, e sí son stao a perícolo de lassarghe la vita per haverla, tanto ghe son imbertonao e tanto ben ghe voio. Ma in efeto la xe anche una fia breviter concludendo che la par un anzolo cherubín, e sí la ha un bochín che fa volontae de basàr. In suma sumario me dubito sí nomè de una cossa, e sí che n'ho cordoio; che qualcun d' i soi no me la vegna a domandar, ch'el sarà el mal vegnúo, el mal trovao: perché ho deliberao de galderla mi, no mancando de essa. E pagando el so debito, a ghe farò anche tal parte del mio che la se porà farsi acontentar, e sí no digo minga a menúa, a digo in grosso, e sí insina adesso la ghe n'ha bona capara, che la maniza el mio a che muodo la vuol essa, e sí puol spender e spender dentro e fuora de case, che no ghe digo niente, e nianche nessun no ha da darghe rasòn, che xe una bela cossa esser done e madona. La fa alto e basso e comanda, che la non ha fadiga sí nomè de avrir la boca, e bià essa si saverà far con mi. Oh, che pagheràvio che la me havesse un puoco ascoltao, perché la vedesse l'anemo mio! Orsú, a voio andar de suso a vederla un poco, ché la me ha messo tanto in su le gale, in su le pavarine che si no vago a trescar con essa, a son impazao e farò mal i fati miè. E digo che son sí su la gamba che me basteràve l'anemo de baler quattro tempi del zoioso, e farlo strapassao ancora, e anche la rosina, e farla tuta in fioreti, che no saràve minga puoco. Poh, sí, la serà bona de mile cosse sta fía. Una, la me restaurerà quando me vién el mio cataro, e quando anche sarò fastidiao. L'altra, haverò con chi sboràr e dir i fati miè. Sbio. Tira. Dio sa nianche s'il fante xe ancora zonto con la barca.

ZANE ‑ Chi è quel che sbat?

ANDRONICO ‑ Tira, fía bela... Tira, bestia! Diavolo, credeva che la fosse essa. Aldistu an?

ZANE ‑ Che ve piàs?

ANDRONICO ‑ Hastu impiao fuogo in tel mezao?