SCENA QUINTA

BILORA, PITARO, DINA.

BILORA ‑ Po.a, mo a vé muò a séon catè tuti du chialondena.

PITARO ‑ Beh... Hètu ben magnò? L'han un bon vin, n'è vero?

BILORA ‑ Sí, elo, barba Pitaro! Càncaro, l'è bon. A ve se dire che a son pin, che se me sbaterae na falza su'l magòn.

PITARO ‑ Ben... che vuòtu ch'a faghe? Vuòtu che faelàn a sto viegio e ch'a vezàm presto e belo che 'l vuò dire, e cavònsene i piè tosto entro o fuora. Na fià te di che la tosa vegnerà se ben el no vuò...

BILORA ‑ La m'ha ben dito cossí, se la no fosse mo muà d'anemo. La è an ela cossí un può gregiara, intendíu? De so cao.

PITARO ‑ A intendo ben mi... Mo na fià con pí tosto a s'in desbratóm, tanto miegio per nu. A che muò vuòtu ch' aghe faele? mi per ti, o vuòtu ch'a ghe faelàm tuti du de brigà?

BILORA ‑ No, mo faelaghe pur vu, che saví miegio dire. E aldí; s'a vi ch'el se tire indrio, di vu: «Al sangue de Críbele, che l'ha un marío che l'è un mal càncaro, che se no ghe la dé, el v'amazerà»; e dighe ch'a son stò soldò, che fuorsi haràlo paura.

PITARO ‑ Or ben, laga far a mi.

BILORA ‑ Mo aldí. Dighe pur ch'a son sbraoso e biastemè, e dighe ch'a son stò soldò, no ve 'l desmenteghè, vi.

PITARO ‑ Moà, tírate da un lò, che 'l no te vega, che a sbatarè. Làgame pur far a mi, ch'a ghe farè un spròlico che 'l me intenderà.

BILORA ‑ Vaghe con càncaro se vuogie: sè 'l me la dà, Dio con ben; se anca no, al sangue della Verghene Malgatera, che ghe parerò el verín dal culo. Cassí ch' a ghe fago muzar la lesca per le gambe in t'i scossón.

PITARO‑ Mo tasi, no anàr pí drio scalognanto. Tuòte via, làgame sbatere. Com ditu che l'ha lome?

BILORA ‑ Mo a no sè a che muò, càncaro, i ghe dighe mi. A crezo che l'ha lome missiér Ardochene. A no sè a che muò. messiér Ardo, messiér Ardoche, sí, sí, sí...

PITARO ‑ Sí, sí, da vera sí. Oh de la cà!

DINA ‑ Chi sbate?

PITARO ‑ Amigo, figiola. Di ch'a vorae dire na parole a messiere.

DINA ‑ Chi sívu?

PITARO ‑ Di pur ch'a son mi, ch'a ghe vuò faelare, e l'intenderà ben elo.

DINA ‑ El vegnirà zò adesso.

BILORA ‑ Aldí: dighe ch'a n'he mazà no so quanti, ch'a son sbandizò, saíu?

PITARO ‑ Moà, moà tasi! Tuòte vie. A m' hetu instornio.