SCENA SETTIMA

ANDRONICO, PITARO, DINA.

DINA ‑ Me ciamèvu mi, messiere?

ANDRONICO ‑ Sí, sí, fía, vien un puoco zoso. E diràve ben che le done havesse puoco cervelo, benché la mazor parte ghe n'ha puoco, se cossí facilmente custie havesse muà preposito.

PITARO ‑ Víla chí, missiere, che l'è vegnúa.

ANDRONICO ‑ Beh, fía bela, che dístu?

DINA ‑ De che, messiere? A mo sè mi, a no dighe gnente mi.

ANDRONICO ‑ Aldi: st'omo da ben te xe vegnúo a domandar da parte de to marío, e sí havemo fato un pato, che s'ti vuol andar, che te lassa andar; si an che ti vuol restar, che ti resti. Ti sa ben quel che ti ha con mi e si te lasso mancar. Fa mo co ti vuol e com te piase. Mi una volta no te digo altro.

DINA ‑ Che mi vaga con me marío? Mo on volío ch'a vaghe? A harè agno dí dele bastonè. Ma de in bona fè no, ch'a no ghe voò anare. Che se Diè m'aí a no 'l vorae mè haèr cognessú, che l'è cossí fin poltron, com negún altro che magne pan. Miedio in bona fè no. Messiér no, ch'a no ghe vuò anare, che co'l vego, m'è deviso che vega el lovo.

ANDRONICO ‑ Basta, baste, baste. Vu me havè mo inteso. Sèu satisfato? Quanto ve digo mi che no la voleva vegnir, vu no me 'l volevi creder

PITARO ‑ Mo aldí, messiere: el me ven lomè ire dela cavestrela; che el n'è mez'ora, puoco inanzo ch'a vegnessè a cà, che l'ha dito a Bilora che la ghe volea vegnire, se ben vu a no volivi.

DINA ‑ Che? A g'he mi dito che a ghe volea venire? A gh'e dito che me l'haí squaso fato dire (com disse la bona femena), a g'he dito un tòtene. Laghèlo pur dire, che 'l se l'ha pensò.

ANDRONICO ‑ Va pur in camera, e no criemo pí. Basta, andè con Dio. Che ve par mo? Mi l'averae zurao che la no saràve vegnúa. Volío altro?

PITARO ‑ Messiér no, mi, che volívu ch'a vuogia? A vuò dire che Bilora è un mal uomo, e che l'ha puoca volontè de far ben, e che a fassè miegio a dàrghela.

ANDRONICO ‑ Beh, che vuol dire ste parole? E credo che ghe n'haveremo mi de boto. Che me vustu menazar? No me far andar in còlera, che digo da seno, che se daremo zò per la testa da bon seno. Ti me pari una bestia mi, a spazarte in puoche parole, e va via de qua, e nétate presto che questa xe una maxima che no te la voio dar. Me hastu mo inteso? Che voio adesso in sír de casa, no te lassar trovar, che intravegnerà forsi... Basta. No pí. Mo anè in vento, ch'a no ve vega mè pí.