SCENA SECONDA

Ruzante solo

RUZANTE L’è forza, a’ no posso pí sofrire: a’ son tanto braoso, tanto anemoso, ch’a’ no me posso tegnire de no far costion. A’ son stò impolò in le arme: quando me pare e me mare m’inzenerà, i gh’aéa una corazina indosso e una spagnuola al lò. El besogna che la natura faghe el so inderto e la so fiereza. A’ son uso a far costion co questo e co st’altro, che quando a’ no he co chi vegnire ale man, a’ vegniré con mi stesso.

A’ vuò andar a catar sto soldò per dir-ghe che, putana do’ ’l vene ancuò, che qui dinari che gh’ha dò me compare, è miè’, e che me compare n’ha a dare via i miè’ dinari, e che a’ i vuò. «O frêlo – dirà-lo – el no se vuò far cossí, el no se fa gnan ben». Ah, putana del cancaro, ch’a’ te vuò magnare del cuore, poltron, can, apicò! E dare, e spessegare… L’arà tanta paura, che ’l cagherà dapertuto, e sí me darà agno cossa. E mi a’ scaperé su.

Cancaro, la sarà bela a guagnar dinari senza laorare, con braosarí. E se me compare s’imbatesse a vegnire, a’ diré che faghe custion perché el fo elo che me fé arsaltare ai suò’ compagni, e che ’l me tosse la gonela e la bereta; ch’a’ no vuò dire ch’a’ faghe costion per i dinari.

Che dego-gi fare? Andare a sbatere al so usso? O dego-gi andar spassezanto? S’a’ vago a sbatere, el porae saltar fuora che no me n’avederae, e darme de drio via. S’a’ vago sgrandezando chí denanzo vio, el porae trarme de qualche balestra in coste.

A’ vuogio anare a sbatere: a’ son valent’omo. On’ si’-tu, poltron? Portame i miè’ dinari, se no ch’a’ te i faré cagare per gi uogi via! Vie’ fuora, vie’ fuora, ch’a’ te vuò far vêre che te n’iè bon per mi. A’ te vuò magnare el cuore e desfrizere dela coraela, e darla ai can, e desfrizere del figò, a muò scardoa, sula grêla… Vie’ fuora, poltron!