SCENA QUARTA

Ruzante e Menato

RUZANTE Né pase né gnente! El m’ha dito porco.

MENATO Compare, compare! Mo’ che noela? Che vuol dire ste arme?

RUZANTE Compare, a’ no volea gnan altri ca vu.

MENATO Mo’ son chialò, mi.

RUZANTE Quel soldò bergamasco è-lo vostro amigo?

MENATO L’è me amigo, per çerto.

RUZANTE Fèghe dire le messe de San Griguolo.

MENATO Perché? È-lo morto?

RUZANTE No. El vuò mazare mi.

MENATO No fè, cancaro! Che ve volí-vu deroinare de sto mondo?

RUZANTE A’ vuò combater co elo. Tuogia pure che arme che ’l vuole.

MENATO O compare, le arme n’è per agn’om.

RUZANTE Che, compare? La paura è spartía. A’ n’he paura d’elo, mi.

MENATO No. Mo’ no saí-u che le desgrazie è apareciè? El diavolo è sotile, e assè fiè un poltron amaza un valentomo.

RUZANTE Mi, compare, a’ vuò combatere co elo per el me anore.

MENATO L’è miegio viver poltron ca morire valentomo. No saí-vu, compare?

RUZANTE Compare, a’ vuò combatere. E sí a’ he piasere ch’a’ ghe sipiè, perché a’ stramezarí. Perché, a’ ve diré, compare, con a’ meno tre o quatro bote, a’ me orbo, ch’a’ perdo la vista, ch’a’ son co’ è i cavagi che tira, che se orba. E perzòntena a’ vuò ch’a’ stramezè.

MENATO È-la gran deferienza, che la no se posse conzare?

RUZANTE Mo’ l’è stò… che l’è stò quelú ch’ha fato vegnire quigi che m’ha arsaltò, che me tuosse la vostra gonela. E mi a’ ghe vuò far vêre che gi è poltron tuti, a un a un, a du a du, a tri a tri, a diese a diese.

MENATO Mo’, compare, arecordève che ’l gh’è bon stare sul Pavan. A’ v’andarí a deroinare del mondo e andar malabianto. E po, compare, a’ saí pure ch’a’ se cognosson…

RUZANTE A bel pato, a’ vuò combater adesso.

MENATO Aldí, compare: a’ saí pure ch’a’ v’he sempre consegiò ben. L’è de boto sera. Laghè che ’l sipia inscurío, ch’a’ toron de le arme, vu e mi, e sí a’ ’l faron fuora. Andon a cà, inchina che ’l sia inscurío.

RUZANTE Andon, ch’a’ vuò fare el vostro consegio.

MENATO Andon.

RUZANTE Caro compare, lassème butar zó st’usso!

MENATO No fè, compare. Andon a cà.

RUZANTE A’ vuò fare el vostro consegio.

MENATO Mo’ andon.

RUZANTE Laghème butar zó st’usso, caro compare!

MENATO No fè, compare. Andon a cà.