SCENA QUINTA

Camera di Pantalone con tavolino, bilanciette da oro, e varie monete.

Pantalone e Traccagnino.

PANT. Traccagnin.

TRACC. Signor.

PANT. Va a véder cossa che fa mia muggier.

TRACC. M'imagino che la starà ben.

PANT. Va a véder se la laora, se la leze, se la scrive, se la sta alla fenestra.

TRACC. E se la fusse al licet?

PANT. Voggio saver cossa che la fa.

TRACC. Gnor sì. (Per el salari ch'el me dà, ho anca da far el spion). (vuol partire)

PANT. Senti, sora tutto varda ben se la parla segretamente con Argentina. Ascolta tutto, e vienmelo a contar a mi.

TRACC. Ma se quelle do donne le se n'accorze, le me sflazella.

PANT. De cossa gh'astu paura?

TRACC. Delle so ongie e della so lengua: colle ongie le sgraffia, e colla lengua le pela. (parte)