Scena quinta

Sala regia.

Pantalone.

PANTALONE No m'alla buttà zoso per la scala quella becca cornua? Credo, che questo sia el primo caso, che un ambassador d'un monarca, che va per trattar un matrimonio d'un monarca con una mezzacamisa incognita, che no domanda altro in dote, che una caraffina de acqua, e un pomo, sia stà buttà zoso per la scala, come una zavatta. E pur ste stravaganze, che acqua, pomi, oselli belverdi impedissa un imeneo de sta natura, me dise al cuor delle cose grande. Me sento una certa sinderisi a tegnir man a sti amori... no so gnente. Quei do bamboli, buttai da mi tanto ben condizionai zoso per el fiume... no so gnente. Questi xe do zemelli... Le parole de quel celebre poeta... no so gnente. Se vede in sta ragazza una struttura de naranza patente. In somma no posso parlar per paura della pelle; ma gho dei rimorsi. Se dise, che i sia fioli de Truffaldin, e de Smeraldina; ma figurarse: el pare, e la mare no serve i fioi in quella maniera, e po sti palazzi, ste maravegie, ste ricchezze sfondradone no se fa colla luganega cusí presto. Sangue de donna Cattarina, che vogio andar a far quattro interrogazion da omo de garbo a Smeraldina, e a Truffaldin, e se posso cavar celegati, e che el marron sia, come dubito, vada la pelle, gomito tutto; perché, se nasce un matrimonio d'un pare, e d'una fia, le xe po de quelle tragedie da orbarse, come Edipo, da impiccarse per la gola al rampegon della carne, come una dindietta de grassa (entra).