Scena ottava

Ludro, due persone decentemente vestite che restano verso il fondo, e detti.

ludro Patroni riveriti, so' qua: le scusa, le compatissa, so' tuto per ele.

prospero Voleva dirvi che se avete bisogno di me... (Marco entra nel caffè).

ludro Un momento in grazia. (Ritornando verso una delle persone che sono venute con lui) La ghe diga dunque al sior cavalier che per la cambial dei tresento ducati che scade doman, che nol se toga afano, che la tiraremo in longo un altro mese; che per questo nol meterà fora un soldo, ma che in vece de refarla per tresento ducati da oto lire, come che la xe, la faremo per tresento taleri da undese lire l'un. La lo assicura che ghe vogio ben, e quel che fazzo per lu, non lo farave per nissun altro (la persona parte ed egli si volge all'altra). Ela in zornada la sarà servida del pegno de quele zogie; ma la se recorda de quelo che semo intesi: el sie per cento e l'afar per sie mesi. Co ghe darò i bezzi la me farà una cambialetta della suma. Se dopo i sie mesi no la scode el pegno, le zogie xe perse e la cambial va in protesto. Intanto la vaga là, la staga ben, e no la se indubita che la xe servida con amor da fradelo (l'altra persona parte). So' qua da ela: dunque se la vorà favorir de qua mezz'oreta ghe sarà qualcossa da far.

prospero Va bene: fra mezz'ora appunto sarò in libertà.

ludro Semo intesi (stringendogli la mano). Benedeto sior Prosparo, viva ela e le so morose!

prospero Gran matto! (Parte).

lodovico Posso adesso...

ludro So' qua finalmente... (Vedendo Giulio che lo prega co' cenni) Oh, com'ela sior Giulio?

giulio Caro amico, ho gran bisogno di voi.

ludro Bezzi za?... Ma caro fio, come voleu che ve trova dei bezzi se sè un desperà...

giulio Ah se sapeste!...

ludro Sul se sapeste no trovarè uno che ve daga gnanca un goto de acqua. Fè una cossa: andè in botega da cafè; gh'ho un afar co sto signor, lo sbrigo in un momento, e po so' da vu.

giulio Come vi piace: vi prego a non dimenticarmi (entra).

ludro (a Lodovico) So' da ela.

carletto (avanzandosi) La diga, la diga, e a mi quando me baderala?

ludro Cossa gh'hala, cossa xe stà, cossa gh'è de novo?

carletto So' stà da sior Momolo per veder se el voleva sotoscriver el contrato del negozio che geri la gh'aveva proposto. El m'ha dito che za el gh'aveva zurà de no servirse piú de ela: che el gh'ha pensa su stanote, e che el gh'ha trova che el xe un negozio da ladri, da sassini. Mi voleva difenderla, e lu paf el m'ha dà una man in tel muso.

ludro Ben: e cussí?

carletto E cussí la dise? una man in tel muso?

ludro Vardè che miracoli! co se fa sto mestier, bisogna ben avezzarse ale man in tel muso. La xe zovene, e per questo la fa tante maravegie: quando che la sarà in tei ani, che la ghe n'avarà chiapà una cinquantina, alora che la gh'avarà fato el soraosso, no la ghe badarà piú. - Animo, animo, la toga sta lista, e la vaga in botega a copiarla (gli dà un foglio).

carletto Sior sí. (E za el gh'ha rason... Xe che dele volte no la sta miga a sole man in tel muso, la finisse a legnae) (entra nel caffè).

ludro Ghe domando perdon, ma la vede... Adesso so' tuto soo; cossa gh'è de novo?

lodovico Mio padre è arrivato in Venezia mezz'ora fa, e certamente viene in traccia di me.

ludro Oh cospeto de Diana! L'afar se fa bruto. Caro sior conte, mi no so cossa dir: la s'ha volesto ustinar in sto amor...

lodovico Se m'incontro in mio padre... io conosco la sua severità!... Ho pensato di chiudermi in casa.

ludro Eh giusto!... gnanca per idea. Sò pare pol benissimo penetrar dove che la xe alogià... E pò la se imagina se col bruseghin dela morosa la gh'ha la costanza de star sarà in t'una camera!... - Mi dirave... (Pensa) L'aspetta... Sior sí. Sala che sò sior pare l'abia cercada in Padoa?

lodovico Un amico mi scrisse che tutto ieri è andato in traccia di me.

ludro Dunque femo cussí. La vada via sul momento. In quatro ore la xe a Padoa. Prima de montar in barca la lassa in man del sò servitor una letera datada da Padoa, dove la scrive a sò sior pare, che geri mentre lu la cercava a l'università, ela se trovava a Vicenza. Che arivà sta matina la gh'ha pensa del mandar subito el sò servitor a ricever i so' comandi, e a sentir se mai el volesse che la vegnisse qua. Berto se presenta premuroso, afanà: el sior conte inghiote la pilola, e ela se salva.

lodovico E se qualcuno gli dice d'avermi veduto?

ludro I la gh'avarà tolta in falo... ghe xe un altro che ghe somegia... E po drio strada se drezza soma.

berto Il progetto è bellissimo.

ludro Ela se tratien a Padoa sie oto zorni, tanto che vardemo de combinar sto matrimonio...

lodovico È inutile il pensarvi: mio padre non vuoi sentir parlare di queste nozze. E poi prima di darmi moglie egli vuol vedermi laureato.

ludro Mo che idee!... Prima anzi el matrimonio e dopo la laurea. - In qualunque caso in sti oto zorni che la sta là la pol benissimo dotorarse.

lodovico Quest'anno ho studiato sí poco!...

ludro Cossa mai me contela... La gh'ha pronto el deposito, la xe conte, e no la vol passar al esame?... El saràve el primo caso.

lodovico E intanto Angelina?

ludro A siora Anzoleta ghe parlarò mi. In casa de sò pare co un pretesto o co l'altro ghe posso andar... - Animo, la vaga in botega, la buta zo sta letera, e po la vegna qua, che mi stesso vogio meterla in barca.

lodovico Va benissimo. Berto, vieni con me (entra con Berto).

ludro Ghe vogio ben. Gh'ho fato imprestar dei bezzi piú de diese volte, l'ha sempre pagà pontualmente, el m'ha regalà da signor... l'è galantomo, ghe vogio ben.