Scena nona

Giulio e detto.

giulio Posso?

ludro Sí ben, adesso vegní avanti vu. (Prende fiato) Diseme quelo che volè.

giulio Caro amico, io sono alla disperazione.

ludro No scomenzè a farme dele smorfie, perché mi no ghe stago. Cossa voleu?

giulio Se io non ho sessanta ducati, mi trovo alla vigilia di andar in prigione.

ludro Una zizola! No minga sessanta lire, sessanta ducati?

giulio Tale è il mio debito. Voi sapete che fra giorni devo essere impiegato in una fornitura, e questo formerebbe il mio precipizio.

ludro No se podarave vardar da tirar in longo?... Conosso tanta zente... Co chi gh'aveu sto debito?

giulio Col signor Prospero Raspetti.

ludro Co quel razza de can!... Caro amigo, fè cussí, andeve a costituir da vu medesimo, perché qua no ghe xe riparo.

giulio E la mia povera moglie!... Se sapeste... Quell'indegno insidia l'onor suo... e questa è una vendetta che fa per punirla della sua virtú.

ludro Come? come?... el xe inamorà de vostra mugier? Oltre che in tel imprestarve i bezzi el v'averà scortegà con un'usura de nova data, el vorave ancora de soravia?... Eco per esempio, mi mo a ste cosse no ghe stago. Mi gh'ho un stomego de bronzo che digerisse tuto, ma questa mo no la posso digerir. Andar a precipitar una famegia, un povero capo de casa perché una dona onesta, una bona mugier no vol perderse... no la ghe sta, e sangue de diana me meto de mezzo mi, e no vogio che la gh'abia da star.

giulio E come ho da fare...

ludro Lassème pensar... - Sessanta ducati, no xe vero?

giulio Sessanta ducati.

ludro Sessanta ducati no xe una gran cossa... e sessanta ducati i ghe sarà.

giulio Ah caro amico!...

ludro Pian, pian, no me ringraziè, perché del mio no meto fora un soldo gnanca se caschè morto. Quando che posso me piase de far del ben al mio prossimo, ma sempre co quel dei altri; col mio no, perché no vogio che nissun gh'abia obligazion co mi.

giulio E come dunque?

ludro (Sior sí... xe vegnú el momento da meter in opera el mio colpo da maestro che coltivo da tanto tempo. Prosparo se lo merita per el so cativo cuor, e perché piú d'una volta el m'a trufà le sensarie). Ancuo gh'avarè i sessanta ducati... ma no basta: vinti anca de piú, e altri vinti po che me li magnarò mi, perché no fazzo mai gnente per gnente. Basta che me trovè uno che meta un scarpion s'una cambial.

giulio Non saprei...

ludro No importa: vado in piazza, co do lire ghe ne trovo quanti che vogio.

giulio E posso sperare?...

ludro Sperar?... la xe fata. Anzi per magior prova, se mai ancuo no gh'avessi da disnar, tolè sto zechin, che mi lo ritirarò sora i bezzi che v'ho da contar. Stè quieto che l'afar xe fato... E po tegní per fermo che quando Ludro mete fora dei soi, se no casca el mondo quelo che s'ha destinà gh'ha da nascer. Adio... (A Giulio che insiste ringraziandolo) Oh per carità no me sechè altro!... Vago in botega a bever un goto de aqua, che gh'ho una sè che no posso piú (entra nel caffè).

giulio Eh, non c'è che dire, la sua sicurezza mi rianima. Non è uomo da lasciarsi ingannare dalle illusioni... E poi non avrebbe arrischiato uno zecchino.