Scena quarta

Ruzante solo

RUZANTE O Ruzante, desgraziò pí che tuti gi uomeni del roesso mondo! O fortuna, nemiga de tuti i miè piaseri che se può dire e fare, che maleeta situ ti e chi creerà mé in ti! Adesso che a' diea aére un puo' de ben, la m'ha fato cargar de bastonè, e sí m'ha privò de tuto el me ben, che me sa piezo (ché de le bastonè a' ghe son uso aérghene). Che se per mala ventura la Fiore m'ha vezú a dare, la no me vorà pí veere, che la dirà che a' sarò poltron, da puoco, e che no me basta l'anemo; e sí dirà el vero. De muò che 'l no ghe sarà pí armielio negun che a' no me amaze.

O povereto mi, desgraziò che a' son, zà che el me besogna morire per amore, an? Paçinçia, dasché agno cossa ven da Dio. Cancaro, el me duole fieramen sto brazo, ma inanzo che m'amaza, a' me 'l vuò anare a far veere, ché a' cherzo averlo snoò. (Si guarda un braccio, palpandoselo con cautela) Perché, s'a' dego morire, a' vuò morir san de tuti i miè limbri, e con sipia guarío... a' vuò fare che se dighe de Ruzante per tuto mé el roesso mondo. (Esce impettito, con l'aria fiera di chi rivolge grandi propositi).