|
N° 65
LA TENPESTA
Faséa
caldo, gera giorno, splendéa el sol. In cao là oltra 1 se sentìa on brontolar de tenporal, ma indove
ca me catavo mi, gera tuto seren. Nel manco de n’ora, de scavesson, se ga
onbrià el mondo. El siel el ga fato ato de inuvolarse e ga prinsipià on tanbrar
lontan lontano. Dopo, senpre pi tacà, pi forte, pi continuà se sentìa on
tonesar 2 e se
vedéa on lanpesar che ’l te faséa vegner la pele de oca. No se stava drio a
contar i sbiansi e tuto sventava minosoquanto 3. Paréa che s-ciopasse tuto! Mi, picinin, pi
che de gaver paura e de tremar no podéo far gnent’altro. Me nona la diséa:
“Pori i me tusi ancor ne i canpi, co sto tenpo co i bafi incrosà. Sperem che i
ghe la fassa de rivar casa suti vanti che el tenpo el se meta pilacar!” Da la
corte le galine le gera nà incoatarse drento el punaro, le vache in stala le
burlava, i porsei ne i staloti i rumava, el musso ligà nel sotopòrtego el
sapegava e i osèi i gera nà sercar scanpo drento el frondame pi fisso. Altro
che le oche e le arne le paréa beate. Ele le ga na tal mota de pene che zamè
l’aqua la riva a bagnarghe la pele e fasendo le sgrandessone, verzendo e
sbatendo le ale, paréa le ciauscasse 4: “Sperem
che ghin vegna zó a secie roverse, cussì l’aqua smarsa de la vasca la se lava
par ben da i schiti e dal paltan e podemo, fintraménte, sguaratarse par ben”.
In volta par la corte no se vedéa n’ànema viva, pi deserta de on simitero in na
note orba de luna. Me nona, poareta, a on serto momento la me ga dito: “Bison
ca rabonem el Signor disendo orassión, ca dimandemo pardon pa’ i nostri pecati.
Brusem, sguelti, de i rameti de ulivo benedìo”. Ela la ga ciapà na foghera 5, la ghe ga messo
drento on par de spaletà de sénare co de le bronse inpissà, la ghe ga slargà
parsóra, a fato, na sbrancà de fojéte de ulivo gavù da l’ansiprete el dì de le
Palme, in cesa, par doprarlo quando che ghe fusse stà la bisogna. La nona la ga
posà la fogara justo a óro 6 de la casa co la corte, dessóra el scalin
grosso de piera bianca, propio in sentro el van de la porta spalancà. La stava tenta che le foje no le
ciapasse vanpa parché el fogo el le gavarìa arse in pressa, sensa darghe el
tenpo de far fumo. Invesse, la bronsa la le gavarìa rosegà de lento e cussì se
sarìa possudo far gran mota de fumo, che ’l xe bon par l’Altìssimo co fà quel
de l’incenso. Chissà quante altre porte contadine le stava fumando come la
nostra! Mi sofrìa la me parte de batarela, me nona, in pi che par ela, la
spasemava anca par i fioi e par la canpagna e la diséa criando: “Sperem che sto
porsel de tenpo no ’l ne raza tuto e che no ’l schissa el formento e l’erba. Se
el fà el malsestà e la ne va mal, par noialtri poareti, la xe fame mora. Co sto
bruto muso par che ’l ne voja far morir de carestia!” E ancor la diséa: “Tonio, supia pian pianèlo sora le
bronse ca se fassa na mota de fumo e chissà mai che la Madona no la ne veda e
la interceda al cospeto de Dio par jutar noialtri porican!” La nona la se faséa
segni de crose e la ressitava el rosario. “Prega anca ti -la continuava- furse
qualche Santo el te scolta, ti che ti sì ancor inossente!” E dopo na scaregà de
tóni e de saéte ca no sò dirve, dopo on scravasson de giosse grosse xe vegnù zó
la tenpesta, a seco, fasendo levro tuto torno de giarin 7 de giasso. La ga durà poco
ma la xe stà on flagelo! Quando che sto finimondo el se ga sfantà e le
nuvolasse le se ga sbalà via, se ga verto na gran s-ciarassana e tuto se ga
presentà ne la so desgrassia trista! La frasa 8 la gavéa pelà tuto: morari, cassie, onari,
castagnari, figari, salgari, saresare, pomari, nogare, visele, stropari e anca
le piante selvàdeghe del bosco. El formento el gera tuto inzenocià e l’erba
schissà! Che desperassion!…
Quela volta lì de ulivo benedìo ghin ga fumà gran mota e,
anca se no ’l ga esaudìo le orassion, tanta xe stà (e ancor la xe) la speranza
ne l’ànema de la gente!
Precisassion general valida par tute le
note: in sto me quarto libro meto l’acento su tuti i vocàboli (tronchi, piani, sdruccioli, bisdruccioli), come se el fusse on normal dissionario.
|