N° 283

LA SPOLENTAÙRA

Quando che se roversava la polenta cusinà ne la ramina ¹ par slargarla par ben sóra el panaro ²  e farla sorar, par quanto che se gavesse scorlà el caldier ³ a ghin restava senpre tacà on velo e pi grosso che ’l gera, pi contenti gerimo noialtri tusiti parché quela roba lì, la gera roba che la se gavarìa gustà fra puchi minuti. No ocoréa che fusse la mama a netar a la perfession el caldier, nò: se no gera on toso gera on altro a raspar caldier e méstola ⁴. Poareto el mas-cio sarà sù drento el staloto! Elo el  rumava invanamente spetando de védarse trar el sbevaroto ⁵ ne l’albio ⁶ fato co la sbrodegaùra ⁷ de le vansaùre ⁸ del sorgo coto. Le spolentaùre ⁹ le vegnéa rancurà dal caldier co on cuciaro e le se inmuciava in on piato grando e fondo. Quando che tuto el gera stà par ben rancurà, la mama la ghe slargava parsora na spolverà de canèla in cana e quatro bei pissegoti de sùcaro: el tuto el deventava na finessa! Tuti savemo (parché tuti gavemo magnà, chi pi chi manco, polenta, i vèneti, varda on po’, i xe ciamà ‘polentuni’) che la polenta (freda, calda, a fete, frisà in tecia, ontà nel tocio de la lecarda, rostìa al forno, brustolà a la gradela) la se spósa co tanti magnari: col bacalà, col formajo de tute le sorte, co la late, col lardo, col salado, col museto ¹⁰, co le baldonele ¹¹, co le cincionele ¹² , co le sparagagne ¹³, co le renghe, co i osèi ec. e tuti sti ben de Dio i se pol magnar crui o coti, col tocio ¹⁴ in tecia, cusinà al forno, rostìi a i feri: come a ognun pi ghe piase. Ma par i boce, tusiti o femenete che i fusse, la polenta pi saorìa la gera la spolentaùra fumante condìa co canela e sùcaro. Ricordo che me mama, quando che la polenta la stava par farse, la ciamava sùito i so tusi e noialtri se lassava lì de zugar, qual che ’l fusse el zugo, par córar a farse na pi che bona magnada. Màriavè, che bontà che gera la spolentaùra!  Quando che ognun el gavéa finìo de magnar la so porsion doprando el sculiero o el pirón, el netava el fondo del piato col déo ¹⁵ e dato ca restava senpre na s-ciantina de polenta o de canela o de sùcaro par finir se dava, lì, co la lengua tuta par fora, de le bele slecade.