N° 276

ON PATERNOSTRO E LA SÈLA *

Ghe gera na volta on sant’omo che ’l gavéa altro che on gran desiderio, quelo de vèdar che ’l gera stà bon de insegnar a la gente come se faséa a pregar ben. Lu, poareto, el doprava le pi bele parole, i pi bei proverbi e esenpi a no finir. No ’l sparagnava fià e tenpo e tute le ocasion le gera bone par semenar sentense e diti. El seitava repèter: “Se ga da pregar co fede s-ceta, co reta intension, co cor sincero, co spìrito ùmile, sensa distrassion, co gran fervor ec.”. El brao omo el parlava a ùgnole persone, a s-ciapi de gente, ne le case, cese, par crosare, pontare, piasse e na volta, propio quando che ’l stava al sentro de na gran piassa, ghe xe vegnù na ispirassion, quela de indir na gara metando in premio el so caval par chi che gavesse superà na data prova. La prova la gera sta qua: “Chi che xe bon de dirsù a la perfession on Gloria, n’Ave Maria e on Paternostro el vinsarà el me caval”. No gera che ’l bon omo el fusse siorasso o che ’l gavesse altri cavai o muli o àseni, ma gera cussì vanpante la so passion de vèdar che almanco na persona la gavesse inparà de pregar ben che ’l gera disposto a ris-ciar tuta la so sostansa. In tanti i se ga parecià par sta conpetission e a judicar se le orassion le vegnéa dite in modo reto no gera sol che l’omo pio, ma tuta la gente, che la se catava lì. Tuti quei che i faséa la prova, poridisgrassià, come che i se metéa a pregar prima o dopo i cascava in falo e cussì un par volta i vegnéa sbandù. Dai e dai, a la fin se ga presentà un che ’l prometéa solenemente che ’l ghe la gavarìa fata a dirsù, defilà e sensa distrassion, tute le orassion. Sicome sto personajo el se gera presentà ben securo, tuti i trategnéa el fià e i stava a vardar come che la nava a finir. Càspita, se gavarìa sentìo volar na mosca, se la ghe fusse stà! Come ognun mejo el podéa, el tegnéa l’ocio fisso su l’omo inzenocià, che co le man junte e i oci al siel el nava vanti co la so rèssita. El Gloria xe stà dito perfeto, l’Ave anca, el Paternostro fin a la so prima parte de mejo no se gavarìa podesto far ma, tirando na sboconà de fià par dirsù la seconda parte, i oci de l’orante i se ga spostà dal siel a la sèla, che la stava de sóra de la gropa del cavalo. Lora, tuto interessà: “Anca la sèla, vero?” Ahi, par sta distrassion el furbeto orante el ga perso la scomessa, el caval e anca la sèla!

* Stravecio raconto rimanejà.