N° 244

COSSA ZELO ON MAUSOLÈO? *

Tanti, ma tanti ani indrìo, inte na ìsola vivéa on re e na regina, che i se voléa tanto, ma tanto ben. El re el se ciamava Mausolo, la regina Artemisia e l’ìsola Caria ¹. In quel’ìsola lì tuti i vivéa felissi e contenti e pi felissi e contenti de tuti gera el re e la regina.

Se sà, tute le robe le scominsia e tute le robe le finisse e, purtropo, a finir massa in pressa xe senpre le robe pi bele. Sta copia de spusi ben afiatà la gera el vanto del so pòpolo e la maraveja de tuti i pòpoli de torno via. On bruto giorno, parò, xe morto el re e la regina, poaréta, la xe restà sola e desperà. Come che se constumava a quei tenpi là, ela la ga fato brusar el morto e la ga rancurà par ben la sénare restà. Dopo la la ga messa drento on cofaneto tuto de òro ². L’Artemisia, co la speransa de farlo vìvar drento de ela, ogni giorno la zontava na punta de sculieréto de sta sénare, smissiàndola a del vin drento na copa de cristalo. Quando che xe finìa la sénare ela, volendo a tuti i custi far calcossa, che ’l lo mensonasse in eterno, la ga pensà de farghe na tonba granda che mai ³ e bela ca no sò ^3a cussì che de pi bela e pi granda in eterno mai se gavarìa podesto far. La regina la ga ciamà da tuto el so regno, da i regni arente al suo e anca da queli distanti i pi bravi artisti del so tenpo e la ga dà òrdine parché i trasse sù na tonba che pi mejo no se podèa far. I pi bravi architeti, ingegneri, pitori, scalpelini, laoranti i se ga aplicà de lena e in puchi ani xe vegnù sù na costrussion cussì bela, ma cussì bela che la gente la diséa: “La xe una de le sète maravéje del mondo”. Tuta la gente, quando che la vardava sta pi che bela construssion, la diséa: “Varda che bela tonba l’Artemisia la ga fato par el so Mausolo!” Un diséa sto so pensier drento de elo, on altro el lo diséa a un tacà e cussì via, parò, sicome che la gente la vegnéa anca da tanto distante, se catava rasse e léngue difarenti e cussì, anca doprando tuta la bona volontà par farse intènder a la fin, dai e dai, a ga ciapà el sopravento la sola parola ‘Mausolo’. Tuti almanco na volta ne la so vita i voléa nar védar la tonba de Mausolo e quando che la gente la se incontrava par la strada la se saludava e la dimandava: “Indove veto?”  “Vago a la tonba de Mausolo”, che sarìa come dir: “Vago al mausolèo”. Col passar de i ani, vuto par evolussion, vuto par involussion, vuto par conbinassion o chissà mai parché, quando che la gente (da viva) la se vol far trar sù na pi che bela tonba la ga ciapà el modo de dir: “Vojo farme on mausolèo”. I xe in tanti che, quando che i se cata de fronte a na tonba grandiosa, no i pensa manco par sogno de dir: “Che bela tonba!”, ma i dise: “Che bel mausolèo!” Prova ne sia che ognun quando che ’l se cata de fronte a la tonba de l’inperator Adrian el dise: “Che bel MAUSOLÈO ’l se ga trato sù l’inperator Adrian! ⁴ ”

*    Raconto in parte vèro, in parte da mi libaramente fantasticà.