N° 39

EL VEDELETO CIUCIA

Ricordo che quando na vaca la faséa on vedelo, i me zii i lo metéa nel canton pi internà de la stala, al de for de le corenti d’aria parché no ’l se ciapasse la costipassion ¹. La stala la gavéa on porton grando par far nar for i bo missi a copia par posarghe el dovo ² de sóra de le so cope ³ e, anca, la gavèa na porta pìcola, che la se verzéa par portar for el luàme ⁴ ben inpacà parsora el cariolon par portarlo fin al luamaro. Quando che se spalancava tute do ste porte, a tirava de quei rèfoli ⁵, che i gavarìa fato male a tuti, tanto pi al vedeleto. Guernando e riguernando el leto al pìcolo animal, i me barba no i sparagnava la paja parché elo el dovéa star al suto e ben netà. Par mejo sicuressa, i smissiava drento a la paja anca de le sbrancà de ferume de fulimiero de fen cussiché la bestióla no la gavarìa fato le bróse e gnanca ciapà la palmonite. I òmeni i ghe rifaséa el leto pi volte al dì parché la roba, che la bestiola la scagotava, la nava lì su l’istesso posto indove che ’l stava anca elo. Come tuti i èssari viventi in via de svilupo, el nostro picinin el patìa senpre fame e, quando che no ’l se tacava a la teta de so mare o al ciucioto de goma inpirà nel canolin del secio de luminio, pien de late bon slungà co aqua e late in pólvare, el pianséa come on putel. Ahi, el me faséa tanto pecà! Quando che ’l smeolava ⁶ col piansoto ⁷, mi ghe navo rente consolàndolo e caressàndolo. Lu, tuto incorajà, el smenava la coa in tondo slungando a pi no posso el so muséto, verso de mi. Visto, parò, che de pape no ghin rivava, el riscominsiava a criar ⁸ e, lora, mi ghe ficavo in boca on me déo e lu el ciuciava beato. Se sà: “chi che se contenta, gode!” Mi ghe faséo le mignògnole e elo el mumiava ⁹ contento e, intanto, mi ridéo come on toseto felisse parché godéo par le gatèle ¹⁰ che ’l faséa al me déo. Na man la faséa da ‘tata’ e quel’altra man  da ‘mama’ co gratadine sul so cragneto. Dopo che elo el se gera stracà de sto ciupegar ¹¹, el sarava i oci e pian pianelo el posava la testolina sóra la paja. Mi, pa’ no svejarlo, ghe gratavo par n’altra s-ciantina i du bitórsoli ¹², che, quando che elo el fusse cressù, i sarìa deventà i so corni e stavo a vardarlo. Che belessa, el me paréa felisse e contento!

Chissà, furse nel so sarvel el stava sognando la teta, quela vèra ¹³ de so mama!