|
N° 237
EL MAR EGÈO *
Tanti, ma tanti ani fa, ancor
prima che vegnesse al mondo Cristo, vivéa in Grecia on re che ’l se ciamava
Egèo 1a Sto re el
gavéa on fiol che ’l se ciamava Tesèo 1b
e sto toso el gavéa on cor da lion e el bramava de deventar on omo de
gran virtù. L’Egèo, ormai nà vanti co i ani, sicome che el gera de sarvel fin e
el vedéa le robe par longo, el voléa tanto pareciar la strada par so fiol
parché, na volta che ’l fusse vegnù a mancar, el Tesèo el nasesse sul trono e
el fusse incoronà re co tanto de mèriti sui e za stimà qual omo forte, pien de
corajo, brao, fodrà 2 de benemerenze e de gloria. El toso, par conto
suo, el spasemava de far calcossa de special e pien de bona volontà el sercava
na bela e bona ocasion par demonstrar le so propie virtù. Tesèo a tute le prove
el rispondéa: “Boia scheo, sta roba qua xe boni de farla tuti. Mi vojo far on
ato che nissun sipia bon de farlo o pa ’l qual nissun gabia el corajo de farse
sóto”! Vivéa in na ìsola distante, ciamà Creta, on monstro de nome Minotauro 3, che ’l gera el
teror de tute le genti. Sto bestion, quando che un el metéa pié in sta ìsola,
el lo brincava, el lo copava e co do sboconà el lo mandava zó de strangolon. El
Tesèo, anca se tuti i ghe dava contra come so pare, el ga deciso de nar a far
fora sto nimalasso pi che cativo. Na bela matina, Tesèo, tuto pinpante e
menàndose drio on s-ciapo de so amici, el xe nà in riva al mar e, quando che el
stava par saltar sóra la barca par nar a Creta, so opà 4 el ghe ga dito: “Caro fiol mio, mi pregarò i
dèi che i te juta e i te staga tacà. Te àuguro tanta bona fortuna e de fàrghela
de copar quela pi che bruta bestia de orco. Ti te sè che ti te sì el me sol
fiol e se ti no te tornarè san e salvo, sarà come sa fusse morto anca mi.
Corajo: va e torna vitorioso! Parò, mensónatelo ben e dìghelo anca a i to amici
che, quando che la nave la tornarà indrìo, se le robe le xe nà ben de far
sventolar na bandiera bianca tacà al penon 5
pi alto, ma se le robe le xe nà mal de far sventolar na bandiera mora. Tiéntilo
ben inamente!” Tesèo pena rivà ne
l’ìsola, come che ’l ga visto el bestion, in on bàter de ocio el lo ga fato a
sbrandei. Conpìo el pi che grando ato, el canpion e tuti i so amici i se ga
parecià par tornar indrìo e de spessegon 6
i ga slargà le vele al vento. La barca la volava de onda in onda e, quando che
se ga presentà a fil orizonte la sàgoma de la tera natìa, i ga dà man anca a i
remi par nar pi sguelti. Tuti i mostrava la so contentessa sbacanando,
sbrassàndose, balando, cantando e, orcocan, in sta baraonda nissun el se ga
mensonà de la promessa fata al re Egèo: in caso de vitoria de tacar la bandiera
bianca in punta del penon. Passa on giorno passa on altro, on bel dì, da la so
postassion par tegner de ocio el mar, el guardian de ronda el ga visto spuntar
na maceta a fil orizonte. Cossa sarala mai, cossa no sarala mai? Man man che ’l
puntin el vegnéa arente el se faséa pi grando e pi ciaro e a on serto momento
la sentinela la ga capìo che la gera la barca del Tesèo. Sguelto co fà on
lièvore el xe corso a dir sta bela notissia al re, che tuto sotosora el xe
corso in óro 7 de
la rocia pi alta, che la stava a pico 8
sóra el mar. L’Egèo, poareto, col cor in gola el tirava i oci par vèdar mejo e
intanto el dimandava: “De che color zela la bandiera pi alta?” Ma nissun el
catava el corajo de dirghe el color. Quando che elo, co i so propi oci, el ga
visto che sventolava el vessilo moro el se ga sentìo s-ciopar el cor e desperà
el se ga butà zó da la rocia, sprofondàndose ne l’aqua fonda del mar. Tuta la
gente, vedendo quel ato grando de desperassion de l’amor paterno del re Egèo,
la xe restà inmacacà 9.
Da lora, parché tuti i cognossesse sto triste fato e tuti i lo mensonasse in
eterno, i ga canbià el nome a quel tòco de mar ciamàndolo el MAR EGÈO.
* Raconto in parte vèro, in
parte da mi libaramente fantasticà.
|