N° 284

PORO POLIDORO! *

Vivéa na volta on bel, bon e telijente tosato, che ’l gavéa davanti de elo tuta la so vita da vìvar. Come tuti i tusi de sto mondo, anca elo ’l faséa le robe de la so età: el zugava e ’l se divertìa co i so conpagni. So popà, che ’l ghe voléa on ben de l’ànema e che ’l voléa che sto so fiol el vegnesse sù co bona creansa e ben studià, el ga pensà de mandarlo da on so gran amico parché el ghe insegnasse le bone manere del reto vìvar. El toso el se ciamava Polidoro, el popà Priamo e l’amico Polimnestore. La storia la xe inscominsià a Troia e i tenpi i gera, pi o manco, inte ’l otavo sècolo, vanti che nassesse Cristo. Desso ve conto de come che xe nà le robe.

Come ca ve go pena dito, el Priamo el bramava che sto so fiol el fusse slevà ne la manera pimejo. Elo el ga parecià pa ’l fiol tante bele robe faséndoghe on coredo degno de on fiol de re co tanti bei vestiti, sàndali, cinghie e altro. El ghe ga dà, anca, na grossa borsa inpacà de schei, sia de quei pìculi sia de quei grossi. “Orpetina, el se diséa el Priamo, a me fiol no ga da mancarghe gnente par poder vìvar ben par quei ani che ’l starà distante da casa mia”. Na volta che tuto gera a puntin, Priamo el ga sielto le persone pi fidà, che le dovéa conpagnar so fiol nel viajo finché no ’l fusse rivà a l’abitassion del so caro amico Polimnestore. El Priamo el gera stà drio roba par roba a tuti i preparativi parché el voléa èssar securo che a so fiol, na volta lontan, no ghe mancasse gnente. Na matina, el popà, dopo basi e abrassi e dopo gaverghe dà la so benedission, el ga fato partir el fiolo. El viajo el xe nà ben e el tosato el xe rivà san e salvo co tute le so robe a la regia del re Polimnestore. Sto amico de Priamo, quando che ’l ga visto el toso, el ghe ga fato na bela e bona acoliensa e el ghe ga fato tante feste ca no savarìa dirve. Tuto paréa che nasesse lissio come l’ojo. Invesse al Polimnestore, che ’l gera restà co tanto de oci dopo che ’l gavéa verto el casson e visto tuti i òri, i gioiei, i argenti e le piere pressiose inmucià drento, sicome che ’l gera ingordo, a ghe xe nata la spissa de guantarse tute quele richesse no respetando le scadense de i tenpi de le rete mese par mese, ma de ciaparse tuto e sùito. Indove che ’l nava, co chi che ’l stava, in tuti i àtimi el Polimnestore el faséa el finton de voler tanto ben al toso e de starghe drio co gran afeto. Par renforzar sti so modi par ben e par salvar el muso de fronte al toso e a la gente, el lo portava de qua e de là, el ghe insegnava tante robe bele, el lo conpagnava a teatro, el ghe faséa catar in tola i mejo magnar, insoma, el lo tratava come se el fusse on so vèro fiol. Tuti i diséa convinti e maravejà: “Varda el re Polimnestore come che ’l trata ben el fiol de Priamo” opur “Varda on po’ ti quanto ben el re Polimnestore el vol a Polidoro“ opur “Quanto che ’l xe brao e bon el re Polimnestore co Polidoro” e altre robe de sta qualità. Ma, órcocàn, nel so cor el Polimnestore el coava na bruta e cativa idèa, quela de portar via el tesoro al toso! Passà el tenpo bastante par far crèdar a tuti che elo, el Polimnestore, el gera on vèro benefator, on giorno, quando che ghe xe parso de poderla far franca, el ga menà el toso in on posto foraman e lì, a tradimento, el lo ga copà. La vita del poro Polidoro la xe stà stroncà, l’infelisse Priamo el ga pianto fin che ’l xe scanpà e chissà mai se quel’inbrojon de Polimnestore el se ga godesto el mal robà. Che ’l Polimnestore el gabia vissù seren o col rimorso dopo sto sassinio le xe robe sue, ma na roba xe secura: che no ’l se  portà a l’aldelà gnanca on scheo.

“El diàolo el fà le pegnate ma no i coerci” e col passar del tenpo se xe vegnù a saver de sto fato bruto ca no savarìa dirve de pèso. Ma daromai no ghe gera pi gnente da far. Xe, parò, restà on dito che ’l ricorda sto ato sielerà e quando che se vol dir che na persona la xe falsa o traditora o sleal o inganadora da lora se constuma dir: “Thraces iusiurandum ignorant” ¹.

* Raconto in parte vèro e in parte fantasticà.