N° 077

LA SAÉTA E LA NOGÀRA

In on canton de na spana ¹ de tera de propietà de i me noni ‘i Pieri’, pena for de la contrà, nando drio la strada che la menava e la mena a la vale bassa, sùito dopo le vasche che le rancurava l’aqua de la sorgente, justo sul limitar del bosco, ghe gera na bela e vecia nogàra pi alta de na casa. La se tegnéa tanto da conto ² parché, co le nose catà sù, a ghe la se faséa a inpienar na mota de séste. Se podéa magnarle da sole o col pan a volontà, se podéa dàrghene a chi no ghin gavéa e, me mensono che, có passava el frate sercanton, che la gente la ciamava ‘el frate converso’, a se ghin dava na mota anca a lu, che ’l le insacava drento la so bisaca ³. Mi credo e cussì tuti i pensava che sta nogàra la fusse stà inpiantà o nata da sola intivando ⁴ qualche vena de aqua soteranea parché, par quanto che la fusse forte e lunga la suta de l’istà, ela la gera senpre de on verde ben nutrìo e el maneghéto de le so foje e le istesse foje no le se fiapava mai cussita tanto da lassarse cascar de picolon ⁵ come che gera par tute le altre piante. Ne i giorni d’istà noialtri tusi portàvimo a i laoranti ne i canpi el magnar del mezodì sarà sù drento on fagoto ⁶ fato co on gran fassoleto co le so coche ingropà. Drento ghe gera pan, formajo e salado. Col conpanàdego se portava, in on fiasco fodrà co la paja o co le strope propio minùe de salgaro, anca del vin pìcolo parché quelo grosso in on primo momento el te tirava sù si par on poco, ma dopo el te gavarìa tajà le ganbe. Cussì se diséa. De sóto l’onbrìa de sta gran nogàra noialtri tusi, ca rivàvimo senpre par primi, se stava a spetar che rivasse i òmeni da i canpi, che i se portava drio sóra na spala o la forca o la sapa o el baìle o el rastèlo a seconda de i laori che i stava fasendo. Se i stava arando i lassava l’araro nel canpo ma i se portava drio i bo e le vache e no sol par tegnerli de ocio, ma anca par farli sbeverar a la fontana e par farli sponsar on fià. Ben, na volta xe s-ciopà on tenporal, on tenporal ca no ve digo! Somejava che ’l vento el se portasse via tuto: i cupi de le case, le tirèle de le visèle, le piante del bosco, insoma, tuto quel che stava de sóra de la facia de la tera. Le saéte e i tròn no i se podéa contar, l’aqua la vegnéa zó pilacando e el vento no ’l dava segni de rechie ⁷. A on serto momento se ga sentìo on s-cioco cussì tacà e cussì potente che ’l parèa che ’l se fusse scargà in cusina. Tuti i xe restà de sasso ma, par fortuna, in casa no xe capità gnente. Quando che xe finìo sto tenporalasso se xe nà fora e se ga visto tuta la ruìna che gavéva fato sto tenporal desgrassià e quando a sera mi a go conpagnà le vache a le vasche de la vale par farle sbevarar a go visto che la nogàra la gera stà fulminà. Al so posto ghe stava on gran vodo e par tera se catava a la sanfasson ⁸ quei rami che no i gera stà del tuto insenerìi da la sita ⁹. El trnco ¹⁰ la parèa on gran palo spacà par longo e da na parte el gera tuto moro e carbonizà.

Ghe ga dispiasso a tuti e anca a mi de védar quela bela e granda nogàra ridota in quel stato. Chissà mai sa vedarò ancor n’altra nogàra conpagna. E parché nò? Na volta o l’altra la podarìa èssar la volta bona, almanco vurìa sperar.