|
N° 147
EL GIUSTAOSSI
Desso ve conto de come na volta el giustaossi
1 (ciamà
a i me tenpi: el dotor de i ossi), el me ga messo a posto na me caìcia 2
scordà. 3
Gero bocia e stavo a
Castelo e, quando ca podéa, nava da me nona par star ne i canpi, far calcossa
de ùtile e far passar el tenpo. Na volta, dopo che se gavéa rastrelà tuto el
fen de na macia 4
tegnù a pra ne la vale e el gera stà cargà de sóra el careto grando, mi a só
montà suso el càrgo de fen par tegner fermo e sentrà el persenaro 5.
In sta manera, i me zii, che i stava de sóto, i gavarìa possudo ligarlo par ben
co la corda a i so gansi in óro del leto del caro. Finìa l’operassion a go
vossudo restarghe dessóra par rivar casa belo còmodo. Par mi quel viajo el
sarìa stà on bel svago e me sarìa sentìo pi che felisse vedendo che la strada
la vegnéa magnà da i bo. Da là sóra, i canpi, le piante, le visele, la
cavessagna e tuto quel che gera torno via el sarìa parso difarente e pi belo.
Come sarala stà, come no sarala stà, stà de fato che, furse parché na rua del
caro la gavéa intivà na busa fonda che mai, el cargo el ga dà on scosson ca no
ve digo. Mi a só slissegà zó, come on péro smarso 6,
da de sóra de la mota de fen e a só croà zó de rugolon par tera. Màriavèrgine 7,
mancomale ca no me só copà, ma na me caìcia la se ga stracolà! On me zio el me
ga portà a spale e pena rivà casa el ga spacà na massèla de mas-cio par tirar
for la mególa. Na me zia la ga scaldà on giosso de ojo bon inte na pignatela e
la lo ga versà dessora la mególa rancurà in on piato parché, dato che la gera
vecia, la se gera secà e indurìa e se dovéa farla rinvegner. Cussì col piron
ela la la schissava e la xe nà vanti finché la mególa la xe deventà na papeta.
Dopo gaver lavà e sugà a dovere tuta la ganba, la zia la ga spalmà par ben e
pian pianelo sta medessina sóra la parte ofesa e la ga infassà tuto a puntin co
na longa fassa. Fate tute ste robe, on me zio el me ga conpagnà meténdome sóra
el palo, quelo de traverso del telaro, de la bricicheta da omo fin casa, da me
mama. Ela, poareta, quando che la me ga visto la se ga messo a criar e la me ga
portà a brassocòlo in leto. Sicome el mal no ’l passava par gnente, ogni matina
ela la sbatéa la ciara de on ovo par far on inpaco, che la spalmava sul roan 8.
Infati se diséa che mególa de mas-cio e ciara de ovo i gera le do medessine
pimejo par curar le macaùre. Passà altri giorni mi a no gero bon de posar el
pié in tera gnanca par on àtimo e la ganba la gera tuta gunfia. Cussì me mama
la ga dito a na persona che par piasser la nasesse dal justaossi tal de i tali,
che da tuti el gera cognossù come el pi brao justaossi de tuti i paesi e le
contrà de torno via e elo, dopo poche ore, el xe rivà co la so bici. Quando che
’l me ga visto el ga dito: “Corajo! Nissuna paura ché desso ghe penso mi!” Do
persone le me ga tegnù fisso pa i brassi e un par la vita e elo, ciapà el me
pié malà, el ghe ga fato far on mezo giro co on straton seco. On s-cioco de la
me caìcia, on me sigo, on me pianto e el so: “Gheto visto? Tuto a posto!” Come
par miràcolo, intanto, se gera sparsa la vosse che gera rivà el tiraossi dal
fiol de l’Aneta de i Pieri e cussì xe rivà lì altra gente, che la gavéa bisogno
de le so cure. El justaossi ben volontiera el ga pensà a tuti. A la fin, dopo
de gavérse sugà el suór, canbià el pancioto 9,
lavà le man, magnà do bele fete de salado bevéndoghe drio on bicere 10
de bon vin moro, che me mama la ghe gavéa slungà, elo el xe saltà dessora la so
bricicheta felisse e contento de gaver conpìo on ato ecessional bon par mi,
belo par i altri, ùtile par lu parché el se gera messo in scarsela du franchi 11.
|