|
N° 167
COME CHE XE CANBIÀ I
TENPI!
Quando ca gero picinin
e voléo saver come ca gero vegnù al mondo, me mama la me ga contà che on
giorno, nel qual ela la gera nà ne l’orto par tor na vèrza, alzàndo le foje
basse par scoèrzerghe el scataron
1 e
poderlo tajar, la ga catà mi ca dormìo tuto infredolìo. Come che ela la ga alzà
le foje, mi a go scominsià a piànzere e ela, gavendo capìo che mi a gavèo tanta
fame, la me ga dà el so late e pian pianelo a só cressù fin a deventar come ca
a gero. Me popà, da canto suo, el me ga contà che na volta che ’l xe nà al
marcà par cronpar on bròcolo col boton, quando che ’l xe rivà casa, pena tirà
for da la sporta el bròcolo e dopo gaverghe levà le foje grosse, al posto del
boton el ga catà mi, ca dormìa chieto come on anzoleto. Suor Maria Pia,
invesse, la me confidà ca a gero vegnù al mondo portà da na sicogna vegnù da
tanto, ma tanto distante e sta sicogna la gavéa le pene pi bianche de i càndidi
gili de Sant’Antonio. Don Piero, che gavendo tanto studià el gera ben informà, parlando
a vosse bassa e trando i oci e le man al siel, el me ga spiegà che la gera stà
òpara del Spìrito Santo el qual el sà ben cossa che bison far par parar torno
el mondo nel verso justo e far nàsser i putei quando che xe el so tenpo. A le
maestre e a i maestri no me só mai ris-cià de dimandar spiegassion su sto fato,
parché gavarìa possudo èssar ciapà par on massa curioso o par on dìscolo e, no
se sà mai, èssar messo in castigo nel canton de l’aula, de drio de la lavagna.
Parò, gavendo sentìo sonar tute ste canpane, mi gero pi che securo de
savèrghene una de pi de i me conpagni e de ste secrete robe a só restà convinto
finché no le se ga s-ciarìe da sole. Ben, dìteve tute ste bele informassion de
stiani, passo a la storia ca ve vojo contar!
Mi a go on amico pi
che caro che ’l ga on fiol che ’l stà trando la vosse a galosso 2
e pi volte sto me amico el me ga confidà de voler parlar col fiolo de le robe
delicà de la vita, vanti che ’l peta in man a de le brute conpagnie. Nel dopo
disnà de oncó, sto me amico el xe vegnù catarme e el me xe parso mato patoco.
Puareto, el suava, el gavéa i trèmiti e i oci i gera sbalucà. Eco cossa che ’l
me ga dito: “Ti te sè, caro Tonio mio, che el me Pierin el stà faséndose omo e
sicome mi vurìa èssar par lu on popà modelo e moderno, tuti i dì pensava de
come tacar boton co lu par parlar de le robe de la vita, de come che xe fata la
dòna, de come che xe fato l’omo, insoma, a voléa parlarghe de ste realtà
resservà. Stamatina a go ciapà el corajo a quatro man e ghe go dito: “Caro
Pierin, aromai ti te sì on ometo e xe rivà l’ora ca dovemo parlar de robe
difissili da omo a omo. Te vala?” “Va ben, popà, nemo sóto el pòrtego cussì
podemo contàrsela stando in disparte a l’onbria e al fresco”. Lu el parte tuto
inpetìo e mi ghe vo drìo, lu el se senta e mi me sento, lu el me varda e mi lo
vardo, lu el me par sentà su la bonbasa 3
e mi me paréa de star sentà su le russe 4,
lu el par fresco come on garòfalo e mi me sentìo suà come on fornaro davanti a
la boca spalancà del forno infogà. A la fin, lo seto, caro Tonio, come che la
xe nà a finir? Visto che mi no fiatavo, elo el sbòssega come par s-ciarirse la
vosse e dopo el me dise: “Ma dai popà, no stà far el tìmido e no invergognarte,
dime: cossa xe che te vui saver?”
|