ATTO SECONDO

Scena prima

Sier Tomao solo

SIER TOMAO [uscendo di casa] El sè una gran cossa, che son vegnúo in questa tera zà tre mesi, per muar àiere e per star con l'anemo contento, che non me possa ancora drezar a viver in pase con sta mia mogier. La vuol pur che sempre buta via el mio, e contentar i suò apetiti, e no varda a la mia impossibilitae. La vuol adesso che traza un sciavo, che sè stao in man de' Turchi, e tignirlo con essa per imparar vertue. E' la vogio compiaser in questo, perché, se no 'l fesse, sempre lame rosegherave, sempre la me tegnirave strucolao. L'ha bona çiera de zovene; el sarà anche bon da altri servissii. La dise che 'l sa cossí ben cosir, cossí ben taiar, e che l'ago ghe par tanto bon in man, e che'l fica sempre i ponti con tanta galantaria, con tanta misura... Che diavolo! La sè vertue anche questa galante e piasevole, da done.

El sarà anche bon da vegnirme da drio anch'a mi per fante, e sí credo che l'abia bona forza per vogar de mezo. Che gran quantitae de dineri sè questa? E' 'nde spenderae volentiera el dopio, e poder aver el mio intento con quela forestiera che son inamorao. Se mia mogier averà sto sciavo, l'atenderà a l'ago, a farse taiar e stricar le veste, e sí no me vardarà sempre drio, e sí no vorà sempre saver donde son stao «Che avèu fato da la tal? e da la tal?» Anche mi sarò più libero de quel che son.

Onde poràvio catar costori? Anche Ruzante ghe sè andà drio anche esso, e sí no vien ni un ni l'altro. E' voio andar çercando per le contrae. La vista no me serve tropo ben se no i vedo da lai, da lonzi no i porò figurar. Sto tanto caminar no far a preposito per el mi cataro. E' me voio voltar de qua, forsi i caterò.

[Esce].