Scena terza

Sier Tomao solo

SIER TOMAO A le vagneli, e' me ho levao un gran cargo da le spale, a rescuoder sto sciavo a mia moier. L'atenderà mo a farse taiar a esso nuove sise, de cassi, de invistiure, e de sto diavolo de sbalçi, che, co' i sè pí grossi e pí grandi, i ghe piase pí e sí dise che le par meio.

E' poderò mo atender al mio amor, intravignando l'inzegno de Ruzante de mezo, che me dreza su la via che abia mio intento. Benché credo che sarà gran fadiga, ché sto bestion sè tanto pregro che mai no compie. El sè do ore che 'l sè andao a çercar sti sciavi, e sí no vien mai, gnanche no se pensa che i poderave esser tornai a casa... L'ha pí de l'aseno ca del cavalo! [Inforca gli occhiali] E' me voio meter i ociali, se 'l vedesse mai. [Si guarda intorno] E' no 'l vedo. E' voio andar spassizando davanti casa de madona Doralice... In sto mezo el porave vegnir. [Muove qualche passo].