|
BONIFACIO
Si fosse stato nnemmiccolo porzì
l'avria trovato! sto mmalora de
patrone sarà nato pè tormiento mio!
STRULEY
(Importuno incontro! costui mi ha veduto!).
BONIFACIO
(E sto piezzo de vastasone, st'ommo
brutto co lo quinnece a levà, che
sta facenno llà appostato?).
STRULEY
(Mi guarda attentamente!).
BONIFACIO
(Mme tene mente sott'uocchio! ajemmè!
la cera è tonna de n'ommo de justizia
travestuto! se fosse ammaturato chello,
che m'ha scritto cainatemo?).
STRULEY
(Potessi partire!).
BONIFACIO
(Se vota attuorno, e pò me torna a tenì
mente! Ah ca lo tremmoliccio già se
sta facenno na partita a tresette dinto
a le ddénocchia!).
STRULEY
Amico, addio...
BONIFACIO
Non t'accostà, ca mme mengo nterra,
e tanto non mme può toccà, ca stongo
nsarvaguardia!
STRULEY
Ascolta.
BONIFACIO
Non t'accostà te dico... vi ca ccà
ce vo lo braccio de Milord, ca si non
t'accuso non ndebeta carcerazione!
STRULEY
Io sono un galantuomo...
BONIFACIO
Galantuomo con sta faccia! non pò
essere... tu ce porte scritte alommanco
trent'anne de servizio co Capità
Alisandriello.
STRULEY
Ma perché ti spaventi?
BONIFACIO
Lo perché lo saccio io, e lo saje porzì
tu, ché ne staje facenne lo sasco...
fatte la rasso, ca co na capozzata
te rompo l'arco de lo pietto!
STRULEY
Chi credi tu che io sia?
BONIFACIO
Uno de chille, che hanno a caccia...
STRULEY
Sì, non errasti, un cacciatore son'io.
BONIFACIO
Visi non l'aggio 'ngarrata!
cacciatore de mierole spennate?
di' a chille amice, che t'hanno
mannato, ca si mme vonno
là lo riesto, farrimmo le cambiale
nove da pagarse ncópp'a lo quinto
de la mesata.
STRULEY
Ma tu sei equivoco: io son
un Signore di queste vicinanze,
molto portato alla caccia.
BONIFACIO
(Che me fosse 'ngannato! a me veramente
ogni sbirro me pare secutorio! ).
STRULEY
Osserva: questo è il carico per la polvere,
questo il sacchetto da pallini.
Vuoi pruova maggiore?
BONIFACIO
E puorte tutta sta roba pè accidere
l'aucielle? n'abbasta schitto la figura toja?
STRULEY
Ti sei sincerato?
BONIFACIO
Comme te chiamme?
STRULEY
Sir Reynald Sciukmis...
STRULEY
Sir Rinaldo Sciurisso mio padrone,
uscia se ne vada, ca dinto a lo boschetto
de Milord non pò sparà chella scopetta toja.
STRULEY
Io lo ignorava.
BONIFACIO
E non te votà arreto, ca chiammo aggente.
STRULEY
Addio. (Esce).
BONIFACIO
Sta vota aggio pigliata na vopa pè storione!
non ce abbasta na libbra de corallina
pe farme passà la paura!
|