2                                                                                                                                                                 AURORA^*

Òstrega, xe le sete de la matina (de l’oto de lujo milenovesèntonovantasète) e on sassìn, a sta ora, el ga el corajo de svejarme! Vardè, co sto caldo, on caldo da bestie che ’l te fà rivar a on boto¹ o a le do de la note par ciapar na s-cianta de sòno, sto fiol de bona dona (salvando la mama, che la sarà de securo na santa), el me ga scorlà zó dal leto. Chi gèrelo? Ma l’Aldo, sto fioldoncan! Elo el sbraitava tuto inboressà e, pi che parlar, paréa che ’l sigasse: “Tonjo, a só deventà nono, a só nono!” Mi, indormensà de profondo, a go sercà de no far la figura del polenton e co on s-ciantiso de genio a go dito: “Sito nono, on nono de carne e ossi o sito on nono tipo na scarpa quando che la deventa vecia, sacagnà e fruà?” E lu, senpre co vosse tuta afanà, el rissiga: “Mi a só nono, on nono vero! Sonia la ga cronpà na putela. La se ciama AURORA e, sicome la val par du, i ghe ga zontà anca CATARINA”. Ciò, a sto punto, me se ga verto le pàlpiere² come se fusse nà sú el telon del palco. De paca tuto xe aparìo lanpante: Aldo el se proclamava nono, nono vèro e no na scarpa fruà. A so favor el portava na testimone fémena. De altro no me mensono parché, come za dito, mi me catavo pi de là che de qua. Ghe gavarò fato le congratulassion, ghe gavarò dito calche bela parola, insoma, lo go sentìo felisse e contento. Finìo tuto sto casoto, a me go rindormensà. Aldo el xe propio on brao e bon omo e lu, nando par strade e piasse, da capitel in capitelo (le ormai tramontà ostarie) el pagava da bévar a tuti in onor de la nevodeta e, cussì fasendo, no ’l se inacorzéa, poareto, che el ‘pontificava’ l’inissio de la so terza età e el tenpo de métarse i noni³. Verso le nove me svejo e me ciùpego on bon cafè. Drento de mi, parò, me rosegava on càrolo. Chi gèrelo mai stà a parlarme in sogno ne la note? Furse on comun mortal o on spìrito? El tarlo el sarìa stà sto qua. Na ‘persona’ la me gavarìa telefonà sbraitando: “Tonio, a só nono, xe nata na putela!” Mi: “Che belo!” Chel’altro: “Te passo la mojer”. Ela: “ Tonio, gheto sentìo? A só deventà nona!” Fin del sogno. Desso, invesse, stavo svejo e navo rumegando sul da farse. Pensa e ripensa, a go deciso de mandar on telegrama. In fin fine, se mi me fusse insognà o se la fusse stà na me fìsima, se quei de su i me gavesse dimandà spiegassion, me sarìa difeso diséndoghe ca gavéo schersà. Parò, se la fusse stà la verità, a gavarìa fato  na gran bela figura. Cussì a go pensà e cussì a go fato. Perdinci, voléo salvar cavra e ‘bròcolo’. On par de ore pi tardi sona el telèfono e chi xe che parla? Mancomale, la xe la nona Madalena, che tuta giuliva la dise: “Tonio, xe rivà el telegrama. Na cosa ùnica. Grassie!” E cussì sta telefonada, par mi ca stavo rosegàndome el figà, la xe stà come l’aqua benedeta, che la ga s-ciarìo tuto. No se tratava de on me èstro, ma de on fato vèro: gera nata AURORA CATARINA.