6          EL SABIONARO^*

Me vedo putel al de sóto de oto ani, vanti che la me fameja la fasesse “sanmartin”¹ nando star da Castelo a Arzegnan. A chei tenpi là no se doprava tuti i detersivi de desso e par netar le pignate, i coerci, le tece e tuto chel che gera fato de metalo se doparava el saldame². Na volta al mese faséa el giro on sabionaro³ che ’l rivava senpre da la parte bassa, indove se catava i posseti, che lora i ghe gera, ma desso no i ghe xe pi, parché i xe stà trati zó e la busa inpienà e livelà. Quando che el sabionaro el stava ancor distante e el stava ancor sconto al de là de la curva de la strada, che la vegnéa sù da la pìcola vale, el se sentia sbecar a tuta vosse: “Sabionarooo, sabionarooo...”. Elo el gera on sbecalón tal che te lo gavarissi sentìo anca a dosento metri. Dopo, pian pianelo, el rivava insima a la pontara col so careto cargo de sabia, tirà da on somarelo poco pi grando de na piègora. El musseto pìcolo pìcolo, el birocio grando grando, sproporsionà. El careto el gavéa, ne la parte in vanti, do stanghe infilà ne le s-cione de fero tacà a i finimenti de corame. L’inbragaùra de i finimenti la vegnéa zó da la sèla posà sóra la schena de la bestia. El somarelo, cussì inprisonà, el funséa da contropeso. Infati el careto el gera sostegnù da do sole rue, una al de qua e una al de là co le so bùgole⁴ infilà ne l’istesso perno de fero. El leto del caretelo el gera tuto sgualivo, come che ’l fusse stà na gran tola pialà. Torno via el pian funséa da óro⁵ quatro tole messe de tajo e le gera alte na ventina de sentìmetri. Ste chì, messe de cortelo, le formava le sponde che, a so volta, le gera ben inmas-cià a i ànguli co s-cione de fero. El vodo, de drento de ste tole, el gera inpienà de sabion rossicio, che el vegnéa ciamà ‘saldame’. Sentendo i sbechi del sabionaro, me mama la me diséa: “Curi, Tonio, curi dal sabionaro. Ciapa sto seceto e sto scheo. Varda de no pèrdarlo”. Mi, na volta rivà rente al sabionaro, ghe diséo: “Me mama la me ga dito ca te me daghi del saldame”. “Quanto gonti da dàrtene? Mòstrame i schei che te ga dà to mama”. E mi verzéo el pugneto e ghe mostravo el boro⁶. “I sarìa quatro bussoloti, ma te ne dò sinque. Ti te sì on bel putel e to mama la xe na dona brava. Dìghelo che on bussoloto el xe de soravia⁷ ”. Tornà indrìo: “El sabionaro el me ga dito ca te diga che el me ga dà na misura in pi, par regalo”. Dopo rimontavo sul marciapié a vardar somarelo e omo. Visto che no se faséa pi vivo nissun, el sabionaro el dava na sbachetà su na culata del musso sbecando: “Ìii.., tiraa..!” El poro somarelo, dando on straton, el partìa de paca e l’omo el riscominsiava: “Sabionarooo, sabionarooo...”.