7          ME NONA E EL SISO^*

Me nona de chei tenpi me la ricordo né vecia né zòvane e mi sarò stà sui sinque-sié ani. On giorno a só restà co tanto de oci quando ca la go vista vegner dal serajo de le galine, messo tra el staloto de i porsei e el casoto del cesso, menando drio on siso¹. Ela la lo strenzéa co tute do le man, ma el siso el gera cussì grosso e forte che pi che portarlo la lo lo strapegava par tera. Mi ghe navo drio, ma no tanto tacà, parché a gavéo fifìo che chel bestion el scanpasse for da le man de la nona. Se el se fusse libarà, no se sà mai, el gavarìa possudo darme na gran sbeconà. Pena rivà drento la cusina, me nona la xe montà sóra el scalin del camin e la ga ciapà el supioto² de fero (chel che ’l servìa par supiar sul fogo quando che sto chì el stava par morir) e la ga messo sto trapelo de traverso fra testa e colo del siso. Dopo, messe le savate³ a i pié, la xe montà sóra sto paleto de fero vodo e co tute le so forze la ga scominsià a tirar par le sate. El siso, ostregheta, el se dibatéa, el se lagnava e, sbatendo le ale, el perdéa na mota de pene che le volava da par tuto. Boia scheo, me nona, co tuti i so sforsi, no la gera bona de fàrghela a sofegar el bestion! Sto chì, porabestia, ogni volta che la nona la molava de tironarghe el colo, el tirava na sboconà de ossìgeno e, refizià, el continuava a difèndarse co forze, via via senpre pi fiache. Me nona la me diséa: “Jùtame, Togneto, ca no ghe la fasso”. Ma mi no me ris-ciavo de narghe rente e, par l’emossion, gavéo molà on fileto de pipì. No catavo el corajo de darghe na man, parò, co la vosse: “Tira, nona, tira ché te ghè la fè”. Ela la tirava, poareta, pi che la podéa e a on serto momento ghè stà come na svanpada de sangue, xe stà come se fusse s-ciopà on fogo de artifissio. Orcocan, el colo del siso, stacà da la so testa, slitando via da de sóto del supiaoro, el se smenava come on buelo in man a on mato! Me nona, che la savéa chel che la faséa, za la gavéa parecià tuto: la gavéa inpissà el fogo nel fogolar e la gavéa tacà el caldiero a la caena drento la capa. Come ca se xe stacà la testa dal colo, ela, de colpo, la ga ficà el siso drento l’aqua de bojo, quasi broàndose na man. Sugàndose el suor de la fronte, la me ga spiegà: “Se no te speni l’oco fin che ’l ga el sangue fresco, dopo no te ghè la fè pi a cavarghe le pene e, cussì, te toca sbrusàrghele col fogo. Ma, lora, la carne la spussa de brusin!” Come el ‘puareto’, belo, forte, grosso no ’l dava pi segno di vita, la lo ga posà, ancor fumante, sóra la tola su on  strasson ben neto e, co na sveltessa da no crédar, la ga scominsià a tironar pene a sbrancà. In quatro e quatroto el siso el se presentava in tuta la so ‘maestà’ nudo, levigà, lùssido come na statua de piera! La nona, ciapà la fòrbese da brusca, la ghe ga verto la pansa tiràndoghe for le buele, el figà, el fiele, el core, el stómego, i polmuni, i rognuni. Dopo, col cortelo grosso, chelo col mànego de corno de bo, la lo ga fato a tocheti. Calche giorno drio (ricorendo on dì de festa solene) xe rivà zie, zii, cusini, nevudi, i conpari de matrimonio, i sàntuli e altri parenti de conparesso⁴ de gradi diversi e tuti i se conplimentava co me nona par la menestra de brodo de siso co le tajadele a i uvi, propio saorìa e anca pa ’l rosto bon e scrocante, da lecarse i déi.