19        EL SPASSACAMIN

On stravecio¹ mestier aromai2 nà perso e che al giorno de oncó³ no podarìssimo gnanca inventar, gera chel del spassacamin. A dir el vèro⁴ , za a i me tenpi sto mestiero el nava faséndose raro, parché ne le case nove, come, par esenpio, in chela de Castelo come in chela de Arzegnan, no ghe gera el camin, ma la stua conòmica e, par ela, no servìa el spassacamin. Invesse, ne le case vece, come in chela de me nona Clorinda in Calpéa, ghe gera el so camin e par tegnerghe neta la cana, servìa el spassacamin. El spassacamin el passava tuti i ani e no ’l rivava mai da solo, ma el gera senpre conpagnà da on bocia, furse el gera on fiolo, furse on aiutante. Sti du i nava de paese in paese, de contrà in contrà, de casa in casa, anca in chele pi foraman. Me ricordo che i rivava spurchi de calìsine5 , che i caminava a pié descalsi e che, se i gavéa le scarpe, i se le portava, ligà fra de ele co i so corduni, a tracola sóra na spala. De sòlito l’omo el portava na matassa de corda rodolà sóra na spala e sóra chel’altra spala el portava na longa pèrtega in punta de la qual gera ligà on grosso masso de bruschi6 , che i dindolava a ogni passo. El toso el se portava a spala na borsa indove, furse, se tegnéa el desinare e, sóra chel’altra spala, anca elo el portava na pèrtega co ligà in punta on masso de bruschi. Me ricordo che, quando che i rivava sul limitar del canselo, no i intrava par gnente in corte, ma i se toléa el capelo, i ciamava la parona par farse cognóssare e par dimandar se la gavesse bisogno de far netar la cana del camin. In caso de si, i dimandava el permesso de intrar drento la proprietà e se se conbinava pa’ i schei de l’òpra. Tante volte, vanti de scominsiar el so lavoro, el spassacamin el dimandava a la parona se la gavéa on tòco de pan, coalche grosta de formajo, na cassa7  de aqua o on goto de vin pìcolo o de graspìa. Se se prevedéa che pa ’l bòto el lavoro no ’l sarìa stà finìo, se patuiva nel presso anca el magnare. El lavoro del netar la cana del camin el se svolgéa cussì. Se la cana la gera ben larga, el toso el se ranpegava snoàndose co fà on gato, nando dal basso verso l’alto, jutàndose co le man e i pié. Elo el se portava drio, sóra na spala, el ròdolo de la corda e, na volta rivà sù, el nava parsóra el teto e, da lì, el molava zó on cao del sogato. El spassacamin messo de sóto el ligava ben fisso, pi o manco a metà de la corda, el masso de i bruschi e, finìo de pareciar sta scoa mòbile, el dava òrdine al toso de tirar sù. El toso el tirava in sù fin che ’l masso de bruschi el rivava in punta de la cana del camin e, dopo, el sigava a chel de sóto che ’l tirasse in zó.  Ne le prime russade de i bruschi, cascava na mota de calìsine, che la inpienava la cusina, la te stofegava tolendo el fià a chi che se catava drento. Sta operassion de sù e zó co i bruschi, la se repetéa fin che no cascava pi gnente. A la fin, el toso de novo el tornava zó de traverso la cana del camin e el netava par ben, co on scoatelo, i busi drento i quali le punte del masso grando de i bruschi no le gerà rivà a gratar via tuta la calìsine lì deposità. Nel caso che la cana del camin no la fusse bastante larga par far passar el toso, sto chì el nava sóra el teto passando dal spionsin. Na volta rivà parsóra el teto, l’òpra de netar la cana del camin la gera conpagna de come che ’l toso el fusse rivà sù de traverso el buso de la cana del camin. Eseguìa la comission e ciapà la so paga, i du spassacamin i ringrassiava, i saludava e i nava de longo pi spurchi de calìsene de coando che i gera rivà, ma, anca, pi contenti parché i tegnéa on franco in pi drento la so scarsèla8.