|
20 MARTIN, EL
PUNTO E LA CAPA*
Cóntala cussì, cóntala cossà,
cóntala come ca te la vui contar, stà el fato che, quela volta là, el poro
scarognà de Martin, par colpa de on punto, el ga perso la ‘capa’! Desso ve
conto de come che xe nà le robe.
Gera el tenpo che mote e mote de
pii pelegrini i nava a Roma, partendo da tute le parti del mondo. Pìculi o grandi che i fusse sti s-ciapi de
pelegrini, nel jorno, i dovéa pur magnar calcossa e, ne la note, i dovéa pur
dormir in calche posto. Par assister sta pia jente, tanti conventi de móneghi e
de móneghe i metéa a disposission de sti bravi cristiani i so conventi parché i
podesse refiserarse, magnar na menestra calda, métar sóto i denti on tòco de
pan e dormir sóto on teto. Ben! In un de sti tanti conventi vivéa on serto fra
Martin, el qual no ’l gera na sima de siensa ma, quando che ’l faséa calcossa,
el lo faséa co tuti i sentimenti, come che mejo el podéa e co tuta la bona
volontà. In sto convento, indove che vivéa el nostro fra Martin, gera rivà la
notissia che, da lì a calche dì, sarìa rivà na tal mota de pelegrini da poder
crear problemi de spitalità. El frate priore de sto convento, el gera pien de
brio e el spessegava pi che ’l podéa ma, sicome che anca lu el gavéa sol du
brassi come tuti a sto mondo, no ’l
rivava a far miràculi e, lora, el ga dà on incàrico a fra Martin diséndoghe:
“Scrivi ben, ciaro, grando e in bela vista dessora del portal del convento A I
ONESTI. SARA’ A I DISONESTI. Me
racomando, scrivi tuto par ben e no confòndarte! El nostro brao fra Martin, pi
felisse de na Pasqua par gaver vudo assegnà sto conpito tanto delicà, val a
dir, de scrìvar na roba tanto inportante, el ga ciapà on bussolòto pien de
colore belo fresco, el ga sielto el penelo manco fruà e, come se ’l fusse stà
el beato Angèlico, el se ga messo a scrìvar, una par una, le létare de la
scrita gavù dal so frate priore. Desso mi no savarìa dirve de preciso se xe stà
parché ghe girava la melona par l’emossion de l’incàrico cussì inportante o se
xe stà, come pena dito, parché no ’l gera na gran siensa o se xe stà par colpa
de na pura distrassion, comunque, a pressìndare da chel che el pol èssar stà,
stà el fato che, na volta finìa la scrita, la se leséa cussì A I ONESTI
SARÀ. A I DISONESTI. Varda on po’ ti,
come che xe rivà el primo s-ciapo de pelegrini, sta brava jente la se xe fermà,
la ga leto la gran scrita, la ga trato i oci for de la crapa, la se ga sbatù el
peto rajonando pi o manco cussì: “Noialtri, pori pecaturi, stemo nando a Roma
par dimandar pardon al Papa pa’ i nostri pecati. Fintantoché no gavem ciapà
l’assolussion, sémo senpre pecaturi e, sa sémo pecaturi, vol dir ca sémo
disonesti. Mea culpa, mea culpa mea massima culpa” e, anca se fiachi stratulti,
i riciapava a caminar co passo fiaco, nando a sercar on altro posto che el ghe
desse spitalità. Par sto fato, nel convento intrava nissun e el frate priore el
jera tuto na preocupassion parché, aromai, la menestra la se gera sorà
deventando freda patòca, ansi, la gera deventà na sbòba inpastelà. Elo el se
diséa sconfortà: ‘Domatina me toca trarla ne l’àlbio de i porsei’. Fàtose scuro
xe rivà na conbrìcola de cefi ca no savarìa dirve de pèso, altro che i ‘bravi’
capegià dal ‘Griso’, chel slandron là, de manzoniana memoria. Cari mii, sti chì
i xe intrà nel refetòrio tuti in festa sbacanando come se i fusse i paruni del
convento e i ga preteso el magnar e el bévar sensa respetar la pi picinina
s-cianta de bona creanza come: par piasser... o calcossa del genere. Anca on
orbo el gavarìa capìo che i gera na banda de sensa Dio! Sarala stà parché se no
se magnava la menestra, la sarìa nà male, sarala stà parché i frati, puariti, i
gera stà ciapà da on gran fifìo, stà de fato che el frate priore, i frati veci
e i frati novissi e, anca, el nostro fra Martin, i ga servìo, de tuto punto,
sti sgrandessuni maleducà. El frate priore, col cor a tochi, el ga passà la
note in bianco sgranando el santo rosario e el se dimandava a ogni posta: “Ma
come zela sta storia, ca no só bon de capir, che tuti i pelegrini i se ferma
davanti al porton, i sgrana i oci, i deventa zali, i scominsia a criar, i se
bate el peto e i va via co la testa sbassà”. La matina drio, de bonora, el xe
nà for del convento e el se xe messo indove che se fermava i pelegrini. Infati,
poareto, el voléa capir el bàndolo de sto gran mistero. Beh, vardando la
scrita, scrita dessora del portal, el lése: A I ONESTI SARÀ. A I DISONESTI.
Màriavèrgine e Màriavìrgola, pa ’l nostro poro prior xe stà come se ’l gavesse
ciapà na sicolà in suca e, vedendo s-ciantisar tute le stéle del siel,
fintramente el ga capìo el moro mistero aromai pi ciaro del sol. Tirà sù i orli
de la tònega pa’ no intrabucarse, el xe corso come on baleton drento el
canpanile, el ga ciapà la corda del canpanon e, tiràndola co tute le so forse,
el lo ga fato scanpanar che pi tanto no se gavarìa possudo far. Tuti i frati i
xe cursi in cesa col fià grosso e i se dimàndava trasecolà se stava par cascar
el mondo. Lì, in cesa, se rivà anca el nostro fra Martin. In do parole seche e
ciare, el frate priore el ga spiegà a i confradei el mistero del parché i
pelegrini i nava de longo co le face longhe e la testa de scorlon.
E cussì, par colpa de quel punto
in pi e messo fora posto, tuti i confradei, ciapà da ‘santa indignassion’, i ga
visto moro e, persa la ‘santa passienza’, ciapà da ‘santa reson’, co ‘santa
justissia’ in quatro e quatroto i ga despojà el poro Martin de la ‘santa capa’
mandàndolo, sensa misericordia e sensa remission, a ‘ciùpese1'.
|