21        L'ASENO A LA RISCOSSA^*

Ghe jera na volta on lion che deventà aromai vecio, el se jera apartà in on posto foraman par tirar i ùltimi fià. El caso, bruto intrigon, el ga vossudo far passar de lì on sengiàle, che tante volte, par salvarse da i denti gussi del lion, el se la jera filà a sate levà, par scanpar via da chel bestion, che el voléa magnàrselo. Esséndose presentà sta pi che fàssile ocasion de vendeta, el sengiàle, col muso ben alto, co na anda da bulo e co arie spavalde, el ghe va arente, el ghe rusa le so rabie sul muso de elo e el ghe mola on gran morsegon. ‘Piove sul bagnà’, dise on nostro vecio dito vèneto e, varda ti, suito dopo passa de lì on toro che, anca lu, na fraca de volte el gavéa fato i so troti par scanparse da chel gran desgrassià. Mensonàndose de i tanti spaventi patìi el ga deciso de fàrghele pagar tute e suito e, cussì, sensa nar tanto par le molesine, el ghe ga inpiantà on corno in pansa. Come ca xe vera la vecia sentensa vèneta ‘i peoci fà peoci, i schei fà chei, la sfortuna fà sfortuna’ e chi xe che lo gavarìa mai dito? Dopo puchi minuti passa de lì on àseno che, vedando el so pi odià nemico ridoto a i stremi, el pensa de vendicarse de tute le amare umiliassion mandà zò par tanti ani. Col sòcolo de la sata davanti, in segno che el stava tacando, el se la gode a sapegar par tera ben a longo, come on gran artista cantore el raja co la so vosse sgangherà a i quatro venti l’inissio de la so riscossa, el buta el sufo de la curta coa a i quatro punti cardinali e, dopo, na volta rivà tacà, giràndose de culo, el ghe tira na socolà da orbi, fracassàndoghe el cragno. El lion, porodisgrassià, el rauna tute le so forse e, vanti de pèrdar i sentimenti, el ghe rinfacia: “Che i forti i me gabia umilià, faséndome scontar le me vece glorie, de malavoja le go subìe, ma, infelisse mi, ciaparle da ti, vansaùra de la sbrodegaura de i scarti del mondo, xe cussì umiliante che me par come sa morisse do volte”!