15        LA BEFANA E ON ME PIANTO

La befana vien de note,

co le scarpe tute rote,

col vestito da romana

ciao, ciao bela befana!

Sto chì xe l’inissio de la filastroca natalissia de la Epifania e mensono che i tusiti a scola, par strada, in casa, i la repetéa in continuassion. Furse no se cognosséa altre storie da contar, salvo calche vecia poesia inparà a memoria e, cussì, sta ‘mùsica’ la se sentìa indove ca te fussi. Parò, ghe jera on parò, parché i tusi pi picinini i diséa ste parole stando pi che convinti, ma i tusi pi grandi i scorlava la testa o i monstrava conpatimento o i ridaciava de scondon o i controbatéa disendo ciaro e tondo che la befana la gera sol che la mama de ciaschedun.  I boce pi sveji i magnava la foja e no sol zamè i gavarìa cantà la strofa ma, a so volta, i sarìa passà a tor in giro chei che no i gavesse verto i oci pi che in pressa. Sa passemo da i altri a mi, mi a só senpre stà (e ancor a lo só) on credulon parché sicome a só senpre nà drio al dito ‘ciascedun dal propio cor l’altrui misura’, me xe senpre parso (e ancor me par) che sia inpossìbil che un nel so sarvel el pensa na roba e co la boca el ghe ne diga n’altra. Ne normal, ‘chi che ’l xe nato quadrato, no ’l pol morir tondo’ e, anca, se dise che ’l mondo el xe spartìo in do fete, na feta fata da chei che i tol in giro e chel’altra feta fata da chei che i xe tolti in giro! Mèriti o demèriti, prima te te sveji fora, prima te te ciapi el to posto parché par tuti val el dito ‘chi dorme no ciapa pessi’ e se na volta ca te rivi al to posto, te lo cati ocupà, no te resta che contentarte del posto restà vodo e da sta postassion se srodolarà la to vita che, nel ben o nel mal, la narà drio al dito ‘el mondo el xe de i furbi’ e tuti i sà che el ‘mondo’ el xe i ‘schei’ e che i furbi i xe chei che i se li ciapa. Sbando a i proverbi e a le malinconie, torno al tema del fato ca ve volèo contar de quando ca gero picinin e rivava la festa de la Epifania. Tuti i grandi i gera d’acordo nel dir e ridir a i picinini che la befana la gera na veceta che la vegnéa no se savéa da indove, che la gera vestìa de strasse, che la viajava montà sóra on mànego de na scoa, che la gavéa on gran capelo in testa, che la gavéa le scarpe rote, che, sóra le so spale, la portava on gran saco inpienà de rrgai pa’ i tusiti bravi e de carbon pa’ i tusiti cativi. Tuti i boce i restava inbanbolà quando che se ghe contava sti fati e se, co i oceti sluseganti e le ganasse rosse i gavesse dimandà spiegassion massa difìssili, a ste domande se diséa che le risposte juste le sarìa stà dà da i regai che se gavarìa catà drento la calza. Man man che sti boce i nava vanti co i ani, ognun par conto suo el s-ciarìa chi che gera la befana e na volta messo el cor in pace el pensava a altre robe. Mi a me gero intestardìo che la befana no la fusse me mama, ma na veceta che, de note e na volta a l’ano, la vegnèa a catar i tusiti casa sua. Sta fissa la xe restà par mi na fede pi che secura ma, dai e dai, sicome i gera in tanti che i me diséa de discantarme e fintramente vérzar i oci na sera, quando ca stavo par nar in leto e, come tute le sere pena finìo de rinbocarme le coerte sóra le spale, me mama la stava par farme el segno de crose su la fronte col déo intinto ne l’aqua santa del stagnólo, a ghe go dimandà se la gera, si o no, la befana. Ela, strenzendo le me manine ne le so man, la me ga dito de si. Lora mi a só s-ciopà in on pianto a diroto e sol le caresse de me mama-befana, le xe riussìe pian pianelo a calmar i singulti faséndome passar a on sòno ristorator.