25        LE GALINE,I UVI E I TUSITI DE NEW YORK^*

Mi a só nato in meso a i canpi e ringrassio el Signore che ’l me ga fato nàssar lì e ne i tenpi justi. Cussì, da picinin, a go visto le galine, le galine faraone, le galinele chechete, le oche, le arne, le arne mute, i porsei, i mas-citi dindio¹, el porseleto risso², le ciupinare³  i pulzini, i pai, i gai, i capuni, i colunbi, le vache, i bo, el toro, le piégore, le cavre col béco⁴, i griji⁵, le isarde⁶, le moréce⁷, i sorze, le farfale, le ave⁸ e tanti, tanti altri èssari viventi creà da l’Architeto Creator del mondo e, ancor, a go visto oseliti, tanti oseliti, prima che i li intrapolasse co i architi⁹, i li copasse col s-ciopo o i li invelenasse co i inseticidi. Ben, on jorno, a Roma, xe montà sul me taxi on foresto e parlando de na roba e de n’altra el vien fora: “Salo, caro lu, che i tusiti¹⁰ de New York no i sà cossa che sia na galina parché no i la ga mai vista? I crede che i uvi li fà el supermarcà. So popà e so mama par far védar a i fioj na galina i li porta a ’l zoo”! Roba da no crédar, par mi quasi da far on colpo! Ghe go pensà sù tanto e ancor ghe rùmego sù¹¹. Ben, nando vanti, no par far invidia o rabia ma sol par far saver come che va serte robe, vojo contar a sti tusiti de New York cossa che le galine le fà pena fato l’ovo. Lora, come che la galina la ga fato l’ovo, la se mete a cantar a tuta vosse: Coco-coco-dè, coco-coco-dè; coco-coco-dè”. Dise on proverbio: ‘Chi va co i lupi l’inpara a urlar’. Verità sacrossanta! Mi, che a chei tenpi vivéo in sta situassion, intendéo chela lengua particolar e ve vojo far la tradussion in lengua taliana: “Un cocco per te, un cocco per te, un cocco per te”. Le galine latine (a i tenpi de stiani, ma propio chei de stiani veci là) quando che le faséa l’ovo le proclamava: “Coco-coco-dèo, coco-coco-dèo, coco-coco-dèo”. Eco cossa che le sentensiava: “On ovo ‘pro eo’, on ovo ‘pro eo’, on ovo ‘pro eo’ ”, ‘eo’, xe ciaro, el stà par ‘lu’, el sior paron: l’omo. Le galine inglesi, quando che  le fà l’ovo, le se mete a gorghejar: “An egg for you, an egg for you, an egg for you!” Nò, mi no ve la fasso la tradussion parché, al jorno de oncò, l’inglese i lo parla tuti. Sentìo, le galine, parfin, le lo canta! Le galine spagnole anca ele, fato l’ovo, le ghe ne dà notissia al mondo intiero: “Coco-coco-dì, coco-coco-dì, coco-coco-dì”. Sentì che tono musical el ga quanto che ele le dise, na volta che el vien tradoto in spagnolo: “Un huevo parà ti, un huevo parà ti, un huevo parà ti”. No ve fasso la tradussion de sto parlar, parché elo el xe cugin de primo grado col nostro parlar. Le consìmili giaponesi, fato l’ato, le se mete a ciauscar: “Cin-cin-cin, cin-ciu-ciò; cin-cin-cin, cin-ciu-ciò; cin-cin-cin; cin-ciu-ciò”. Mi no sò se co so sto far da svanpie o co la scusa del ‘cin-cin’, le fà la parte de le inbriaghe, ma imagino che le alza la vosse par nunziar de gaver fato l’ovo. Le galine francesi, quando che le deventa mame, le se fà quanto mai amorose e tute felissi le canta a i quatro venti: “Coco-coco-dà, coco-coco-dà, coco-coco-dà”. Scoltè l’eleganza de sto so dir, tradoto in francese: “Un oeuf pour toi, un oeuf pour toi, un oeuf pour toi”.  Le galine marsiane (desso che co le nove scoperte savemo che anca in chel pianeta lì ghe xe la vita), quando che le fa l’ovo le se mete a far conpagno de chele terestri. No sò se lo savì, ma core vosse che le galine le ga on sarvel pitosto minùo. Ben, chelo de le galine, che le vive lì, el xe poco pi grando del gnente. Ele le varda senpre in vanti, ma l’ovo le lo fà de drio e gavendo, porecagne, anca la memoria sul scarso, no le ghe riva a far conbaciar el pensier co l’ato, in quanto, se de drio l’ovo el xe stà fato, de drio el resta. Poradisgrassià la nostra infelisse galina marsiana. Ela la gira e la gira, la pianze e la pianze: “Coco-coco-dè, coco-coco-dè, coco-coco-dè”. Ècove, fresca come na rosa, la tradussion ‘ad literam’: “Ma l’ovo dove el xe, ma l’ovo dove el xe, ma l’ovo dove el xe?” Dopo de gaver interpelà tute le consorele e anca el galo, ela la se suga le làgreme de i oci col sufo de le pene pi nete e  la se consola riprometéndose: “Doman ghin fasso on altro. Starò pi tenta,  par no pèrdar almanco chelo”. Le galine padane le xe tute in grìngola e sù de morale. Ciò, lore le se ga fato da poco el punaro¹² e tuto el xe neto de lissia e el xe parfumà. Comunque, quando che ele le presenta l’ovo, le slunga el colo e le sbeca: “Coco-coco-dì, coco-coco-dì, coco-coco-dì”. Tradussion da bèco¹³ a boca: “On ovo par ti, on ovo par ti, on ovo par ti”.

Mi spero de gaver verto na sfesa¹⁴ de luse nel sarveleto de i tusiti de New York e de gaverli fati rìdare, magari no sol luri, ma tuti i tusiti del mondo, che no i ga vudo la fortuna de védar le robe ca go visto mi!