4          LE CAVRE E LE GATELE^*

Mi me mensóno che tanti ani indrìo, quando ca navo ne la casa de i Tonìn, che la se catava messa ne la curva de la strada, de poco de sóto de la casa de le Frighéte, che la se catava messa ne la svoltara¹  pi in su, nando verso Castelo² . Tute do le case le gera costruìe al de drento de do svolte seche, che le girava a gunbio³  streto del stradon dito Via Calavena. La seconda casa, chela de le Frighéte, la se presentava granda che mai parché, oltre a èssar adibìa par abitassion, la funzéa anca da ostarìa. Pena intrà drento sta casona, te te catavi in on gran salon indove se podéa bévare, magnare e zugar a carte. De scondon, inte na stanza de lato, mi sò che i trava a la mora. Sul davanti se slargava la corte co le so tole e le so panchete de legno co le ganbe inpiantà diretamente in tera. Pi vanti, verso el vigneto in diression del castelo de Castelo, ghe gera do piste par zugar a le boce⁴  e, a lato strada, ghe gera on gran albio⁵ de cimento, col canelo che ’l butava senpre. Lì i menava le bestie che, puarete, stracà e suà de bruto, le se refiziava dopo gaver tirà, soratuto in pontara, i cari incargà de robe varie. Ricordo che, da la parte de sóto, tegnéa sù el sbalso, fra strada e corte de l’ostaria, na masiera⁶ fata sù co sassi mori, missi a seco, segnàndone el silio⁷ . Inpiantà inte sta corte faséa onbrìa de i morari⁸ cussì grossi ca mi no ghe la faséa a brassarli. La casa de i Tonìn, me la ricordo co na bela corte sgualivà col giarin bianco parché no se formasse le poce⁹ de aqua piovana. La gavéa, anca, la so barchessa, la so teza, la so stala, i canpi e na mota de bele spaliere¹⁰ de visele¹¹. Drento sta propietà de i Tonìn, qua e là, gera fati créssare de i morari, che i faséa le more sia bianche che nere e, quando che le gere ben maure, mi me le papavo de gusto, a sbrancà. Luri, i paruni, come del resto tuti de zona, i tegnéa i morari par gaver le foje da dar da magnar a i cavalieiri¹² sparpajà, có gera la stajon sua, dessora le arele¹³. De drio de la strada, stava na fila de cassie col so bel fusto alto e co i rami che i sbordava parsora la strada. Ste spuntaure, ogni ano, le vegnéa recià¹⁴ par far fassine par el fogo. Sta fameja de i Tonìn, la slevava do càvare¹⁵, che a mi le piaséa tanto. D’istà, quando che le scole le vegnéa inciavà, navo lì. Se fasìvimo conpagnìa. Ste cavre le stava senpre sarà sù drento el staloto¹⁶ parché, se i le molava (nonostante i ghe fusse stà drio par domarle, essendo le cavre selvàdeghe de natura e salbeghe restando par senpre), prima o dopo le sarìa scapà. Mi gero toseto de sié-sete ani, tegnéo tenpo da pèrdare, de schei no gavéa gnanca on bajoco e a nissun servìa on putel picinin come ca gero mi. A mi me paréa che ste cavre le me fusse tacà. Mi ghe parlavo e, dopo, méssoghe on spago torno al colo, le menavo in giro par le cunete¹⁷ , navo drio a i strosi¹⁸ e giravo in tanti altri posti, parò, senpre drento la propietà. Bastava ca  tirasse na s-ciantina la cavessa¹⁹ e lore le me vegnéa drio. Ele le pascolava l’erbeta e le smenava la curta coa in continuassion. Me piaséa darghe da magnar le foje de cassia sfilàndole da i so nerviti. Ingrumavo le fojete drento el vodo de la man e, dopo gaverla verta, la metéo sóto i so barbin²⁰ par fàrghele tirar sù. Le cavre le se dava de le gran suconà par rivar a la me man, ma mi stavo tento e davo sbrancà de forajo na volta par una. Quando che le ciucionava ste fojete, le me smorbiva el palmo de la man e co chei làvari mòrbii, in movimento continuà, le me faséa le gatele²¹ e mi ghe stavo parché ghe catavo gusto. Ricordo ca ridéo come on toseto felisse quando che le me faséa le gatarìssole al palmo de la man e, par fàrmele far de novo, ghe slungavo n’altra sbrancà de magnar. Ele le me vardava co le seje²² tirà sù, co i oci sluseganti de goduria par el mugo de le fojete che le mastegava e paréa che le me disesse: “Grassie, Togneto nostro. Che el bon Dio el te benedissa e che el te renda mèrito! Varda che doman, noialtre te spetemo de novo!”