6          DAL SALE GROSSO AL SALE FIN

e stava verso el bòto¹ e la mama la se dava el so da far pareciando la tola² e cusinando el magnare, come che gera de so sòlito tuti i dì. El piato prinsipale el sarìa stà la pastasuta e sajàndola come che la stava de sale la dise: “La va ben!” Dopo, passando a i piati del secondo, ciapando el vaseto de véro drento del qual la tegnéa rancurà el sale fin, la dise: “Òstreghéta, el xe finìo! Tonio, par piasser, sfìname on pugneto de sale grosso. Ciapa qua. Tira for da la credensa la bossa bianca, che la xe bela tonda, e daghe na stusada col sugapiati. Me racomando. Ti ca te ghè i oci acuti³ controla ben ca no ghe sia smissià drento de i sassiti. Sgrànalo fin fin, come la cipria. Se no el se desfa del tuto ne l’ojo e asedo e te masteghi i graniti schissàndoli co i denti, te vien el volta stòmego”. E mi me davo el me da far tegnendo streta la bossa, strucàndola e faséndola slitar co forza suso el sale posà sóra la piera de marmo levigà. Sto lavorìo el jera de far slitar la bossa, ruàndola, pena pena e pian pianelo, sóra i graniti. Sti qua i s-ciopava e i se frantumava in tante picinine fregolete⁴. Finìo el primo sgrosson, se raunava tuto col palmo de tajo de la man, rifasendo el muceto. Sto fare el se repetéa pi volte finché el sale el paréa cipria. Finìo de sfinar el sale, la mama la me ga dito: “Ciapa sto scartosso⁵ de sale de sfroso⁶ e serca ben che drento no ghe sia del giarin⁷. Sti inbrojoni de contrabandieri, par ciapar pi schei, i ghe zonta drento pierete. Se te ne peta una in boca, la te spaca on masselaro”. E mi controlavo el sale co gran atenzion, on pugno par volta, slargàndolo ben, movéndolo gran par gran. Finìo, ela la lo riponéa nel bosson de véro verde co la boca larga par poderlo riciapar, a seconda del bisogno, nando co la man drento, a usma⁸, e tiràndola fora, a pugno inciavà, col sale misurà a saraoci⁹, a palpo. El sale sfinà la lo metéa in on vaseto pi pìcolo, anca elo de véro trasparente. Ste chì gera le pìcole robe ca podéo far mi in casa, dando na man. Le faséo senpre volentiera parché ele le me daséa sodisfassion e, cussì, quando ca me metéo a tola, magnavo co pi gusto, come sa me fusse, on tantinel, gadagnà el pasto.