9          I PISSACAN

Ricordo che la mama par far sù i schei e pagarse le marchete¹ de casalinga (par godarse,  cossì, na pensionsina par poder  tirar vanti mejo la so veciaia), la ga deciso de nar a catar sù i pissacan² ne i pra de la pradaria de i Vignati. Sti pra, pi in zó del capitelo³ costruìo a la fine de Via Santo, i scumissiava da la strada, i nava drio na rosa e i finìa co i teraji del torente Cianpo. Sto pensiero par  la mama el jera deventà na fissa e la lo paciolava ‘sine fine dicens’: “Bison ca fassa sù i schei par pagarme le marchete!” I pissacan la li cavava co on cortelo da cusina. Pi de calche volta sercavo de far l’istessa operassion, ma no ghe la faséo quasi mai. Mi ficavo la lama massa poco zó e cussì, invesse de la coa, tajavo solo el ciufo de foje e solo chele me restava in man. L’Aneta la me diséa: “Tonio, lassa star se no ti sì bon, poareto. Le done le vol el radecio intiero, foje e rajsa. Se no te ghe la fé lassa star e canta. Mi me contento de la to conpagnia!” Có el saco el vegnéa sgionfo, lo ciapàvimo un par na teta e l’altro pa ’l colo e lo strapegàvimo pian pianelo verso casa. Có un de i du el se sentìa stracà se fermàvino par sponsarse. Na volta rivà a l’abitassion, ela la li butava drento la vasca da bagno, lassando scolar de continuo on pissarotelo dal rubineto verto de mezo giro. La stava tenta ca no se stropasse i busiti del gàtolo alto, co le fojete stacà che le noava a pel d’aqua. Se el buso el se fusse tapà, l’aqua la se sarìa stravasà, alagando l’apartamento! De tanto in tanto, la li smonava co le man, scorlàndoli sotosora, a sbrancà. La li lavava ben ben da la tera e la canbiava l’aqua pi volte. Na volta ben netà, la li metéa a sgiossolar slargàndoli parsora la pancheta da lissia, piegà verso el drento del vascon. La li ripassava un par un, scartando le foje zale, brusà o smarse e anca i bòcoli, se i se gera massa verti. “El xe passà, el xe vecio, el xe duro, la xe stopa”, le rognava le done se le catava na foja bruta o on fioro spanpanà. La mama la gratava le rajsete de le piantine col corteleto a segheta. Le ‘signore’, che vegnéa a cronpar i pissacan, le voléa catar i radeci niti e prunti, co senza gnente da controbàtare. Ela la se jera fissà de fàrghela a inpienar la pagela che la dovéa assicurarghe el mìnimo de pension. Poracagna, quanta fadiga e quanta tribolassion par far sù chei quatro schei. I radici de pra la li catava sù spacàndose el fil de la schena e la xe nà vanti fintantoché no la ghe la ga fata a inpienar tute le casele, che le dovéa èssar inpienà. Poareta, la se na godù par poco tenpo la gioia del fruto de le so fadighe, parché no la ghe la ga fata gnanca a conpir i so sessanta ani! La xe stà proprio na pension da pissacan!

Come che la xe, serte volte, grisa la vita!..