10                                                                                                                                                             I SORZE, EL GATO E EL CANPANELO

Ai tenpi de stiani (ca no sò), vivéa in on posto (ca no cognosso), na copieta de sorze sposini frischi frischi che, volendo métar sù casa e formarse na fameja, i ga deciso de nar pa ’l mondo, in serca de fortuna. Camina e camina, na volta rivà inte na crosara¹ de case de òmini, usmando²  e nando drio a on bon parfumo che ’l vegnéa portà dal venteselo, i ga intivà on granaro levro³ metà de fromento e metà de sorgo⁴. Lu, che ’l se ritegnéa quasi nòbile (parché nato nel sototeto parsora el salon del palasso paronal), mensonàndose⁵ de na frase da lu scoltà e dita da la siora maestra al fiol del sior baron:“Hic manebimus optime” ⁶, esséndosela ben ficà ne la so ciribìricòcola⁷ , el la ga repetù e ela, che la gera de estrassion pi modesta (parché nata ne la teza de la stala del boaro del paron), la ga dito fasendo la so bela figura: “Là ove se manduca, Dio senpre me conduca”! I se ga intedù de paca e sùito, essendo gran teligenti, i ga messo in pràtica el dito: “Primum  manducare, deinde philosophari” ⁸ .  Felissi e contenti, i se ga butà parsora chela grassia de Dio, ingossàndose in na inbudada⁹ epulònica. I ghe ne ga magnà na sporta e on saco! I alternava du grani de fromento e un de sorgo fintantoché no i se ga sentìo quasi s-ciopar la baga¹⁰ . Catà el gnaro co na bobana da nababi, i ga scumissià vìvar la so vita. Ben presto i ga cronpà na bela sgnar๹ de sorzeti e dopo na seconda e dopo na tersa e dopo n’altra. Sti picoleti, man man che i cresséa, i faséa altre copiete e sta fameja la gera deventà na fameja patriarcale. El solo, a no èssar contento de sto paradiso terestre, gera el bacanoto¹² che, poareto, dopo tanto tribular e suar, el se sentìa derobà e par desperassion el se cavava i puchi penoti¹³ de la so caponara¹⁴ . Vedando sto porocan de omo sorze de zorno e de note ne i so ìncubi, el ga deciso de nar al marcà par cronparse on bel gato. Sto qua, porabestia, dopo gaver invanamente spetà on par de zorni sperando che l’omo el ghe slungasse on po’ de pape,  par no crepar de fame cagna el se ga rifato al so istinto natural. Mensonàndose de èssar de rassa carnìvora, el se ga realizà cassador spietà. Vinta la gnàgnara¹⁵ , i pranzeti i gera assicurà come che la fame la ghe rosegava le buele. La pace par i pori sorze la gera finìa. I tremava par la sbìgola¹⁶ , i vivéa terorizà, i dormìa co on ocio sbacià, i stava sóto sforzo come na susta de assale¹⁷ , cargà. Co le rece drite i stava senpre prunti a scatar par sguissar via da le sgrinfie del chel felin sassin. Porican, i se scarmìa a vista de ocio e la so vita la gera deventà on inferno. El sorzeto manco svejo o pi bibioso¹⁸ o pi baùco el finìa sóto i denti de quel ‘boja’, che, dopo el lauto pasto el se lecava, bruto sfrontà, anca i bafi. Calchedun de la fameja el jera emigrà, ma i pi i voléa restar e vìvar lì, nel posto indove i gavéa visto la luse. Cussita, industriàndole tute e dopo assè rajonamenti, i ga ciapà sta bela risolussion: de métar na canpanela torno al colo del gato! In sta manera quando che chel ‘senza Dio’, quato quato, el se fusse avissinà col so passo felpà, par quanto che el fusse volpon e sguelto, luri, avertìi dal tintinìo del batoceto scorlà, i gavarìa fato in tenpo a filàrsela, meténdose in salvo. Sta solussion la xe stà votà da tuti. Sùito ga scuminsià la risserca de chi che el gavarìa realizà sto ato salvatore, de gran corajo. Un ga dito: “Falo ti”. “Mi no. Lo fassa lu”. “Manco par sogno. Lo fassa elo”. "A no só mato. Lo fassa luri”. E cussì sta storia no la finìa mai e nissun el faséa on passo in vanti! Savìo, cari mii, come che la xe nà a finir? Come chela volta de tanti, tanti ani indrìo có xe capità on fato quasi conpagno e un serto scritor Faselius el ga puntualizà: “NEMO FELI TINTINNABULUM ANNECTERE VULT” ¹⁹ . Traduso sta roba, come só bon, tera tera: “Nissun sorze el ga vudo l’azardo de métar el cínciolo del canpanelo torno al colo del gato!” Podemo conclùdar sta storiela ricordando on proverbio pi a la man: ‘Fra el dir e el far ghè de mezo el mar! No tuto chel ca se vol se pol gaver! E, cussì, i sorze, poridisgrassià, i xe restà ‘pasto’ pa ’l gato!