14        EL BERGNOCOLO DE MARIA

La Maria la vol èssar senpre la prima in tute le robe. Se calchedun el la urta in calcossa, ela la se buta de slanso, pèso de na cavreta salbega par gaverla vinta e, cossì, la passa senpre vanti a tuti. Ve vojo contar la storieta de oncó. Stàvimo ne la me caseta de canpagna e dopo de gaver fato ognun le robe sue ne la so propria abitassion (parché par far durar l’amor e l’amicissia xe belo si star tacà, ma xe mejo gaver anca la selta e la libertà de spassi privà), a ghemo deciso de nar far na papada a la nostra sòlita ostaria. De fora el siel el la molava, no a sece roverse, ma piovéa. Se sà che la piova la xe aqua e, o poca o tanta, la pènetra i vestiti mojàndote¹ la pele e faséndote vegner i brìvidi e i trèmiti. Mi gavéo ciapà sù l’onbrelo grosso, chel da piegoraro, par capirse, e poder, cossì, rincurar de sóto mi e ela. La Maria la xe testona pi de na mula e có mi ghe digo: “Fícate sóto” ela, tuta sostegnù, la dise: “Nò. Mi me fico la me suca² inte sta busta de plàstica. Cossì no la se smojo³ . Par le spale a go dosso on jachetin inpenetràbile”. “Fà chel che te pare”! Nemo verso la careta. A on par de metri da la barocina co la ciave eletrònica dis-ciavo le portele e ela, sguelta pi de na gatela bracà da on cagnasso inferossio, che quasi el se la volesse magnar, la sguissa ne l’abitàcolo. Poareta, co sta pressa spasemà par métarse al suto, la ga sbate la so crapa⁴ dosso el spìgolo de la capota de la vetura. On tonfo, on sbeco⁵ : “Ahi, che male. Màriassànta de Monte Berico, a me só sfrejà! Intanto mi gavéo dà de volta a la màchina e, rivà drento, ho visto che la sbassava el parasol par vardarse nel speceto. La vien fora frignando: “Poareta mi, varda che bota e che bergnòcolo me stà vegnendo sù. Orcocan, varda che corno!” E, pian pianelo, la se unumidìa i polpasteii de i déi par ónzar co na s-cianta de spuo la parte rossà. Sta Maria la tien on caraterin forte (cossì ela la sostien) e, partanto, pur nel dolor lansinante no la ga lassà sfesàr⁶ gnanca na lagrimeta da le bale⁷ de i oci fonfi de pianto. Parò la modulassion de la vosse  la stava sul lemo e in tono sbólsego⁸ . Mi, tanto par farghe védar ca partessipavo a la so pena, a ghe go dito: “Vìdito, sucona?  Se ti te te fussi ficà sóto al coerto del me onbrelon, te gavarissi possudo far tuto co calma. Invesse nò. Ti te fè senpre la divina. Te vui rajonar senpre co la to caponara⁹ . No te me scolti mai. Cossì te te ghè ciapà la to bela tega¹⁰ . Ben la te stà!”