16        PAR DIS-CIOCAR LA CIOCA

Desso ve vojo contar de on modo de far che ’l jera za vecio a i tenpi de ‘Marco Caco’¹ e el jera praticà, chissà mai quante volte. La gera na roba da far ben e la jera na roba dolorosa (almanco par la pora cioca). I sapasorgo i le studiava tute par far vèrzare i oceti a i pulzini in créssar de luna. Co la luna in calo, ste creaturine, le vegnéa sù déboli e tanti i sarìa morti. Na coಠ nà male, la jera na disperassion par la fameja: adìo uvi, polastri, galine, capuni! Al pulzin, finché el xe conpagno³ a on canarin, a nissun ghe passa par la gnuca de spararghe col s-ciopo o de tirarghe el colo rosténdolo al speo⁴. Lu, mas-cio⁵ o fémena che ’l sia, el deventarà grando e grosso co bei galuni carnosi. L’omo no ’l ga da far altro che lassarlo in libertà, a becolar e a tacar cicin el ghe pensarà da solo! La nostra galina, da pulzin deventà polastra, la xe, desso, na bela matrona vestìa elegante co na cimara de mòrbie pene stramacià⁶ . La fortuna de vìvar de pi de sti ‘bipedi’ la jera e la xe stretamente ligà al fato che sti uvi i xe on saco nutrienti e, ciapà ancor caldi e bevù bei frischi, i te infonde na mota de energie. Par amor de crònaca, dovemo zontar che, dopo i sòliti fatarei col galo, le galine le deventa mame amorose a tal punto da canbiar personalità e aspeto e.. ‘voilà, le jeu c’est fait’ (eco, el zugo xe fato): gavem na bela cioca! Rivà l’ora bona, i paruni i pareciava na bela sesta co paja e fen posàndoghe parsora quanti pi uvi ca ghe stava. I ghe ficava suso la cioca novela che, investìa de autorità matriarcale, co cossiensa, la se metéa a far da fogara vivante a i nassituri. La ghe la metéa tuta, poracagna, la so bona volontà! La magnava poco, no la smontava da la sesta par gnente, la dormìa co on ocio sbacià, la se spenotava, la jera na bronsa scotante, on guerier pronto a la batalia. Se vegnéa arente el gato o on sorze, la se rivoltava co far achilesco e la defendéa i so uvi ‘unguibus et rostro’⁷ . Ridota a pele e ossi, no la paréa gnanca pi na galina, ma na mumia vivante tuta sbrojà⁸ . El tenpo el passa in pressa e, come tuto scumissia e tuto finisse, jera rivà el tenpo, a giudissio de i òmeni, che la cioca la ritornasse ovarola. “Bison dis-ciocar la cioca! Xe tenpo che la riscumissi el so dovere de galina”, sentensiava la parona! Fin da i tenpi pi veci, i òmini, par levar le fumane a la chissa⁹ inpuntà, i savéa che bisognava ‘batezarla’, ficàndola drento on mastelo inpienà de aqua zelà. La pora galina no la capiva gnente de sto martirio da mati. La stava par sofegarse, la rantegava, la strabulsava le balete de i oceti, la sbiancava, la sigava ‘cheo’, che vol dir pietà! A ogni inmersion, parò, el so sarvel el se convertìa na s-cianta e, svergà da idée balsane, la cioca la se rinovava galina. Riciapà la vita usual sfornando uvi a tuto spian, pian pianelo, la xe deventà vecia. Saltando zorni sensa far la ‘merce’ pressioza, i paruni i ga messo in ato on proverbio: ‘galina vecia fà bon brodo’e i ghe ga tirà el colo! Tuta la fameja la ga godudo del ‘misfato’. Infati, el nono e la nona i se ga magnà la bona menestra co le tajadele e i altri i ga fato fora el cician polposo. Pensé, ga fato festa parfin Fido, el can, sgramolàndose i ossi grossi e Ivan, el gato, ciuciando e mastegando i ossi pi tenerei.

Chissà mai sa podarìssimo ris-ciarse de dir che anca la galina la podarìa èssar felisse parché, finìa la so vita terena, la stemo mensonando rendéndoghe ‘honorem et gloriam’!