18        CO LE PAROLE LE XE POESIA ^*

De libri a ghin go leti na fila de marei¹ e vurìa gavèrghene leti ancor de pi. De discursi, tronbade² , conversassion, aringhe, orassion, panegìrissi, ciance, filastroche, petegolessi, sprolochi, prèdiche, ec. a ghin go scoltà na fraca³ e vurìa risentir tuto. Cussì scanparìa fin a sentovinti ani. La sarìa na bona età! Ciò, se fusse possìbile mi ghe starìa, ma ‘fra el dir e el far ghè de mezo el mar’. Orcocan, gnanca l’erba ‘vojo’ la taca⁴ nel me orto! Bando a le ciàcole⁵ , la vita la me ga insegnà che có se pronunzia na opinion, sta chì la deve èssar senpre ben ponderà e mai tegnerme securo al sento par sento. Xe  mejo barcamenarse co prudenza, star sul ponderà e, par la question ca vojo métar a fogo, doprar col contagosse l'artìcolo determinativo. Có se schìchera⁶ on dito, xe mejo, serte volte, servirse de l'artìcolo indeterminativo. Xe sempre ben no far el sapienton. “La xe la pi bela, la xe la pi bona, la xe la manco bela”, ec… Xe pi savio conclùdar co on dir nò seco e apelarse al finìo indefinìo lassando spassi: “La xe una de le pi bele, la xe una de le pi bone, la xe una de le manco bele”, ec...  Parò, desso e par stavolta, a mi ca fasso el radegoso⁷ , me concedo de svajolar⁸ . Afermo che, almanco par mi, la pi poètica locussion ca go leto, la xe na imàgine magistralmente fermà, co pena e carta, dal gran Orassio. Ècovela: “Nox erat et caelo fulgebat luna sereno!” * (Orazio, Epod.,15, 1). Securamente el latin el ga on pathos pi vibrante, pi comunicativo, pi conpleto de le altre lengue, anca del me dialeto e del talian. Cussì, volendo mi intrar ne l'ànemo del poeta, me buto zontando altri do agetivi, puntelàndome suso. Un el dà senso a la note, l'altro a la luna. El gran Orassio, pena genial, el ghe ne ga doprà un, mi tri. Chelo de la note el xe fàssile, par esenpio: ciara, dolse, fonda, linpia, plassida, silensiosa, chieta, stelà... . Mi dopararò chel de coa⁹ . Par la luna el xe ancor pi fàssile Ognun el se lo sielga. Mi me fasso inprestar l'agetivo dal sior Leopardi. Saro i oci, ris-cio e traduso l'espression cussì: * “Gera na note stelà e nel sielo seren slusegava la ‘grassiosa’ luna!”

Cari mii ca sté lesando, scuseme tanto: no pensé par gninte ca a só on ‘sapienton’, ma sol on inamorà del bon scrìvar…