11        RIFLESSION!

ar passar a la storia bison far calcossa de spessiale o basta èssar fortunà e nàssar nel tenpo justo?

Tuti gavemo, se no cognossùo, de securo sentìo parlar de Ramsete, Mosè, Budda, Alessandro, Omero, Platone, Pitàgora, Aristòtile, Sèneca, Ciceron, Virgilio, Giulio César, Augusto, Neron, Averoè, San Tomaso, San Francesco, Marco Polo, Cristòforo Colombo, Leonardo, Michelàngelo, Mòzarth, Verdi, Marconi, Einstein e tanti, tanti altri. Mariave’, che caéna de nomi ilustri a go mensonà! Calchedun el ga creà, copà, pensà, inventà, legiferà, comandà, distruto e, comunque, nel ben o nel mal el se ga fato on nome, passando a i anali de la storia. Desso vojo puntar el déo su on omo e dimando: “Ma cossa galo mai fato Pilato fasendo chel poco pi del gnente par deventar universalmente cognossùo?” Infati pi che de gaver fato l'ato de lavarse le man e de gaver dito: “Quod scripsi, scripsi” ¹ , lassando nar cussì sóra la crose el Re de i Giudèi, quali altre robe lo ricorda? Scoltème on altro ninìn. Mi sarìa propenso a védar chei fati cussì. Chela volta che on tal, che el comandava pi de lu, el lo ga mandà zó da chele parti là, el poro Pilato el gavarà molà le so lagrimete lagnàndose: “Hostili Minerva a só stà ficà lontan da Roma”! Sertamente, penso, el se sarà consolà diséndose: “Mejo èssar primo inte na sità de provinsia che secondo a Roma”! Se el tornasse desso, mi penso che el se tegnarìa in bon diséndose: “Fovente Minerva a só stà menà là indove, lavàndome le man e disendo na fraseta, a só passà a la storia!” Infati, in tuto el mondo e fin a la fin de i tenpi, da la basilica de S. Piero a la cesa pi picinina e persa in fondo a na vale o suso on monte, no sol al Vènere Santo, có se conta la passion de Cristo, ma in tute le doméneghe, ressitando el Credo ne la messa, el sacerdote el rivarà a la riga famosa lesendo: … e patì sóto Pónzio Pilato. Sarìa el caso de dir: “Ma che bel …”, ma la xe na parola bruta e mi, ca a só educà, no la digo!

Parò, par sto personagio, che fama mondial e inmortal ghe xe tocà…!