5          PORA AQUA STRAPASSA!

Có a nato só mi, se menava le vache a sbevararse ne la fontana de la vale, desso, drento chel'aqua lì, no scanpa manco i bissi¹ . Có a só nato mi, i pumi i gavéa i bitòrsolo² e i faséa el bao, no i jera bei ma i jera parfumà, desso i xe perfeti, sensa semense (i se diti ‘transgenici’), ma no i sà de gnente. A i tenpi mii, có piovéa, le done le jera quasi contente parché la piova la gavarìa rasentà ancor pimejo³ i ninsui e sarìa nà via anca le onbre de la sènare de la broa⁴, desso se te lassi slargà le robe bianche par du zurni, có te le cati sù, bison ca te le rilavi. A i tenpi mii (chei sóto i oto ani), se bevéa l'aqua tirà sù dal posso col secio ligà a la caena de fero e se sguaratava le robe ne l'aqua de la rosa, desso bison bèvar l'aqua selessionà o filtrà. A i tenpi mii l'aqua piovana, scolà da i cupi, la se rancurava drento le vasche scavà de sóto de la casa par farla bèvar a i animai, desso l'aqua piovana, chela che la vien zó da i teti, la xe mora e àssida. La me generassion la ga catà robe ben difarenti de chele che la stà lassando a chei che ghe vegnarà drio! Ma, furse, a só deventà vecioto e brontolon!… Sarà anca vèro, ma disime: no sarìa belo che anca i fioi de i nostri fioi (e mi fioi no ghe ne go) e i fioi de sti chì i catasse on bel posto indove vìvar la so vita?  Se co la testa da sanbei⁵ noialtri nemo vanti ficando l'aqua drento la plàstica (val dir, par l'omo, el vestito de legno), diséo, drento la plàstica de bosse o bossuni da sinque litri, du litri, on litro, mezo litro, on quartin de litro e on goto, la va a finir ca sofeghem l'aqua e la plàstica la diventarà pi tanta de l’aqua. E in fin fine, indove narala a finir tuta sta plàstica? Mi vurìa dir a tuti: stemo tenti on tantinel de pi a chel ca fasemo, come ca lo fasemo, parché lo fasemo. Butar zó e ruinar xe fàssil, construir e far ben, la xe fadiga e bison⁶ suar. Vardemo l'aqua, poareta, che la se lassa far tuto e no la se lagna mai e, intanto, noialtri la stemo insussiando, lordando, intossegando! L'aqua nel mondo la xe tanta, par fortuna, ma no la xe infinìa.  On proverbio el dise: "A forsa de giossi se suga la bóte⁷ "! El stesso dito el val anca par l'aqua. A forsa de mastrussarla⁸ , giossa drio giossa, va a finìr ca la lordemo tuta. Nando vanti cussì, on doman, e no tanto lontan, altri i podarìa rinpiànzer : "acqua azzurra, acqua chiara”⁹ o ancor de pi: “Laudato si’, mi Signore, per sor’ acqua, la quale è molto utile et hùmele et pretiosa et casta”¹⁰!

Se no volem che la vaga a finìr propio cussì, verzemo ben i oci!