7          LA RIVINCITA DE JOANA

Ménego e Joana i stava vanti co i ani e, có se diventa veci, se se sdèntega e i puchi penoti¹ restà i xe tuti grisi: parò anca da vecioti se vol vìvar in alegria. Scrive on gran scritor latin: “Miscentur tristia laetis"². Luri i se cognosséa da tusiti, nati co puchi ani de difarensa e i vivéa  inte ’l istesso paese. I gavarà fato anca luri le so parti a i tenpi sui e mi digo e sostegno che le xe stà robe fate ben! Te sè come che la xe: se el corpo el se frustra lo spìrito, invesse, el festegia senpre disdoto ani! Porican, no podendo pi far i zughi de la zoventù, i sercava de contentarse contàndose calche braseleta, ciacolando e mensonando i tenpi felissi, passà da tanto tenpo. Eco, desso ve vojo contar de come che na volta i ga sercà de tirar el colo a la paturnia³. Sarà stà le sinque del dopodisnà e, smaltìo el sacrosanto pìsolo, i faséa, come senpre, quatro passi. Joana la xe stà la prima a rivar e la se ga sentà su na bancheta del pìcolo zardin comunal. Có Ménego, chieto chieto, nando dàsio⁴ co anda da sbatù e na siera come se el gavesse la pégola dosso el xe rivà quasi tacà a ela, ela la ga ciapà la parola disando: “Ménego, oncó te me pari ancor pi matemàtico del to sòlito. Varda ben che mi te cognosso da na vita e sò che te piase far el buratin e la marioneta. Eh si si, chi ben scominsia el xe a metà de l’òpara⁵. Ti ti sì on malissioso e on moscardin. Te scominsi senpre co robe pìcole e sconte”. El Ménego, poareto, el xe restà come copà, el se xe blocà de bota, come stordìo e co on fil de vosse el farfuja: “Ma cossa dìsito, Joana?” “Xe propio vèro: ‘Vulpes pilum mutat, no mores’⁶, e ti te sì on bruto mas-cion⁷!” “Mariave’, ma ve ga, furse, morsegà na taràntola? Me par ca stè savariando⁸ ”. De novo, ela, co on soriseto furbeto e malissioso (chissà mai che cossa la stava rumando ne i so ricordi, furse chel capità a disdoto ani o furse chelo a ventidù) e come na birba comare la fica el cortelo drento el cor de l’omo inbaucà. Uando⁹ el so sbarbejo sibilante pèso de chel de na anza, quasi volendo far nar for da i sentimenti¹⁰ el poareto: “Che te vegnesse el balon, fabioco de on finton! Ti te la ciapi senpre da lontan, ma te miri al sentro. To mama la gera na santa dòna, poradòna. Mi la go cognossùa. Varda ti che porsel de fiol che la ga fato!” “Oh, santa Rita da Cassia, santa de i inpossìbili, jutème vu! Cara Joana, gavìo magnà, a mezodì, na scatoleta de ton tosseg๹ ” ? Joana, pi che sbètega¹², regineta de la situassion, volendo petarghe na smusonada sacrossanta e  volèndose levar on scarabisso, la fà na volada planando come on osel rapasse sóra la vìtima par ficarghe ne le carni i so agussi artili e far schissar sangue for da la pele. La Joana, tuta inmulà e sfrontà, la scominsia (come dise on tal Orassio: ‘Dente lupus, cornu taurus petit’¹³ tacando col so basavejo¹⁴  afilà pi de on rasoro¹⁵ a tajar e a brocolar¹⁶ l’ànemo de Ménego, siorinando na ziràndola de insulti: “Perìndirindindìna”¹⁷! E ti te insisti, te fè el gnori, candalosti e fiòldoncàn¹⁸ ca no te sì altro, te stè chieto come na bronza coerta¹⁹, te fè la gata²⁰ morta, el vardabasso²¹, el michelasso²², el maraman²³, el fabioco²⁴ tonto, el sanbelo²⁵ inbessile, el vardainvolta²⁶, el faganel²⁷, el petel²⁸, el fureghin²⁹, el menarosto³⁰, el muso roto³¹, el finton³², el mamo³³, el tananai³⁴, el pauloto³⁵, el santificetur³⁶, la tepa³⁷ perfeta, el petenela³⁸ brincon! Lora spua fora, càvame sta spissa e còntame: come zela ca te vè de sbrindolon³⁹ co la patela⁴⁰  verta”?