9          CÓ I TAJAVA L'ERBA

Tuti de casa se gera contenti. La stajon la se gavéa portà puito, sol e piova in manera justa. Za da giorni i grandi i se raunava de drento el sotopòrtego, sentà su i scagnei a tri¹ pié, par rifar el fil de la lama de le falsi. Prima, parò, le falsi le se uàva² co la piera tonda infilà nel so perno de fero e sistemà parsora el so cavaleto. Ricordo che mi paravo torno sto gran pieron col mànego de na manovela tonda o lo tegnéo de continuo bagnà, sbiansàndolo³ co s-ciansi⁴ d’aqua. Le macaure grosse le vegnéa parejà martelando la lama co on marteleto apòsito, el qual da na parte el gera piato e da chel'altra, a testa rotondà. Na volta libarà la lama dal so mànego e postà la parte scarsa e da rifar sóra la piàntola⁵, a se martelava pian pianelo la parte pi grossa par colmar la parte voda. La linea del fil de la lama la riussìa goba ma, o co la mola o co la piera apòsita a man, la se livelava par ben. A la fin dovéa sparir tute le cape⁶. Ognun el controlava la lama vardàndola co la coa de l'ocio strucà e tastàndola col polpastrel del déo grosso, bagnà co de la saliva. Rifato el fil de la false, a se ghe rimetéa el so mànego blocàndolo co na péndola⁷ de legno. Dopo se tacava la false a on grosso ciodo o a on ranpin inpiantà int’el muro e ben in alto cussiché nissun ghe ciapasse drento, tajandose. Arente a la false se metéa anca el coaro⁸ col so ansin, co le punte ben limà pa’ no spunciarse. Quasi tuti i contadini i gavéa pi de na false e, pena rifata una, se passava a mètar a règola chel'altre. Có se nava ne i pra a tajar l'erba, gera senpre mejo gaver na lama in pi! Mi no go mai doprà la false, parché gero massa picinin. Parò navo ne i pra conpagnando i me zii e, ricordo che có spuntava fra l'erba piante de spanavin⁹, mi corèo a sbregarle¹⁰ co le man vanti che le vegnesse tajà co la false e me le magnavo de gusto. Dovéo spetar, parò, che co la false i zii i rivasse propio tacà a ste piantine dolsi parché, sa gavesse caminà sóra l'erba da tajar, la gavarìa pestà e stortìa.  Sa me ris-ciavo de farlo i gera scapeloti! Strenzendo la parte alta del mànego de legno de la false co la man sanca¹¹, strenzendo el bacheto postà a metà del mànego grando co la man drita¹² fasendo punto de sostegno sul galon¹³ de la ganba drita, tegnendo ben slargà le ganbe, a se faséa meso passo in vanti dando on scato co la lama de la false tegnù in piato e a raso tera e tajando, cossì, na strissa d’erba.  Sta chì la se posava lesiera lesiera par tera come se la fusse stà de puina¹⁴. Có se incapava, par disatension, co la lama in on stisso o in on sasso volava na saraca¹⁵ solene. De tanto in tanto i tajafen¹⁶ i se sponsava e dopo gaver bevù on giosso de graspia¹⁷, i se dava na bela spuà¹⁸ su le man sfregàndole fra de lore e i riscuminsiava a tajar altra erba.

A sera, tornando casa, se parlava del pi e del manco e ricordo che no mancava mai calchedun che el diséa: "Puareti¹⁹ noialtri, sa se vedìssimo le buele²⁰ a le vedarìssimo more come el ludron²¹"!