11   EL FERACAVAI ^*

_N'altra arte, che la xe nà persa, gera chela del feracavai. Anca sto mestier, se un no ’l lo ga visto far, xe difìssil che el se lo possa imaginar. Epur, ne i tenpi andà, tante persone le lo praticava e tante fameje le tirava vanti la vita co sto laoro. El feracavai, a dir el vèro, el mandava vanti pi cònpiti. No sol el metéa i feri a  i cavai, mussi, bo da tiro ma, par esenpio, el giustava i raji de le rue, le tole incarolà o crepà o vissià de i careti, de le barele¹ , de le timonèle², de i biroci³ e de le carosse. El canbiava i timoni spacà, le stanghe saltà, i sercioni de fero fruà de le rue, le ganasse de i freni consumà, le machiniche⁴ incricà⁵, i musarui ruti o schissà, i finimenti da tiro, i basti, le sele e tanti altri angagni⁶. Ogni paese el gavéa i so feracavai e ogni contrà el suo. Ve parlarò sol de chele robe ca me mensono e che a go visto far gironzolando ne le poste de i feracavai del me paese. Mi a go senpre vardà e zamè jutà. Caso mai, chele poche volte ca a go dà na man, gera sol par tegner strete le tanaje apòsite, fornìe (ne la parte che la vignéa streta drento le narise de l’animal) de do pìcole balete tonde. Cussì se pissigava la carne e i nerviti de la narisa, ma no vegnéa ferìa la carne de drento del naso. A tuti i cavai, mussi, muli, bo e vache, a tenpi regolari, ghe dovèa èssar tajà le onge. Gera pi curà chele bestie che pi se doprava par i laori ne i canpi e ne i viaj. De sòlito, ogni feracavai el faséa el so mestier nel so esercissio, ma, a pagamento, el nava anca ne le contrà, ne le crosà o ne le stale foraman. El feracavai el dovéa èssar on omo de gran sperienza parché, se el gavesse falà⁷ tajando el suolo⁸ del zòcolo de la sata de la bestia tajando anca de le venéte⁹ ne la parte viva, la bestia la gavarìa possudo infetarse e morir. Ne la desgrassia, a animal morto, nissun el gavarìa magnà la carne par paura de intossegarse¹⁰. Anca se el fero apòsito, metemo el caso, el fusse stà aplicà malamente, el podeà far deventar sòto¹¹ l’animal. Par el paron, la sarìa stà na desgrassia. Có un el metéa la so ‘sostansa’ ne le man del feracavai, el ghe stava senpre tacà e no sol par jutar ma, soratuto, par controlar l'òpra. Na sola volta a go dà na man intrando nel grupeto de i laoranti. Infati, sicome a gero ben svilupà fin da zovaneto, tuti i me dava on par de ani de pi de chei ca gavéo e gero, anca, belo forte. Cussì na volta a só stà mi a tegner i pié fermi a la bestia; na sata a la volta, se capisse. La vaca la stava ligà col cao de la cavessa curto curto a na grossa s-ciona inmurà. El feracavai el me ga insegnà come tegnerghe ben ferma la sanpa posàndola de sóra del me zenocio. La vaca, puareta, la gera spaurìa, la arfiava ma no la se movéa. Prima a ghe go dà na gratadina a la so barbàgola¹² e dopo, sensa dar stratuni, a ghe go tirà sù la sata posàndola de sóra el denocio¹³ de la me ganba piegà, fasèndoghe far da sgabelo. In sto modo, l'ongia del pié de l'animal la se monstrava par roverso e gera, cussì, propio fàssile tajàrghela co le tenaje apòsite e livelar la parte de sóto co on scopelo che el somejava a na sgubia. Me ricordo che la bestia la stava imòbile su le so tre sanpe, che la gavéa i oci sborli¹⁴, che la perdéa bave da la boca e che ghe tremolava tuta la pele del corpo. A la fin de ogni laoro, el feracavai co la spassaora el raunava in on canton tute le onge tajà parché, a ogni mese, passava el strassaro par cronparle e fàrghene saon. Có tuto gera stà fato a puntin, el paron el se riciapava el so animal tiràndolo par la cavessa e el nava de longo. Par el feracavai, invesse, se faséa sóto on altro omo co la so ‘cara’ bestia da curar.