21   SUPIANDO FASÉO SIGOLAR LA FOJA

El zugo de far sigolar la foja d’erba salbega no la costava on scheo, se podéa farlo par ore e ore, se ridéa on saco, no vinséa nissun e tuti se gera contenti. A seconda de come che la foja la gera fina o larga, tirà drita o messa storta e, anca, a seconda de quanto fià te ghe ghe supiavi dosso, ela la fis-ciava come on canarin o la burlava come on bo. Sto ùltimo son, quando che el riussìa ben, el faséa  s-ciopar le buele a tuti par le sganassade. Có la zente, nel dopodisnà¹, la nava a butarse in léto par sponsarse on fià, noialtri tusi (gerimo quasi senpre solo tusiti), se nava ne i pra o drio a i fossi, indove cresséa na erba co le foje longhe e strete, tute on filamento de nervaure bele grosse. I óri de ste foje i tajava come lamete e se, par sbalio, a te intivavi el so fil, sto chì el te tajava la pele. Ussìa na mota de sangue e, no essèndoghe gnente de mejo, se se ciuciava la feria par far nar for el sangue infetà. Calchedun el ghe faséa dosso la pipì parché se diséa che l'urina, essendo àssida, la gera on bon disinfetante. El zugo de le foje el nava cussì. Rivà in on posto bon e foraman, ogniun el sercava la so bela foja drita, el la ciapava co le punte de i déi par el largo e el pi in basso che se podéa. Dopo, el toso el ghe dava on straton seco, parché la foja la dovéa risultar come che la fusse stà tajà co la fòrbese. Se la foja la vegnéa sacagnà², bisognava butarla via. Co la màssima atension, se posava la parte de la punta de la foja propio de de sóra el polpastrel del déo grosso, blocàndola co chelo de l’anulare. Dopo de gaver ben fissà la foja co la punta da la parte in vanti, la se posava ben, de piato, ne la parte de de sóto del déo grosso del palmo de la man. Pian pianelo, sensa far fisse o sbreghi a i óri de la foja, la se tirava co l’altra man messa de tajo finché i polpastrei de i du deoloni³ i conbaciava perfeto. In sta manera, la foja la faséa da 'corda de violin', ben tirà nel vodo de le gobete fra le do man. Se posava i làvari su le man congiunte e, finamente, supiando vegnéa for la 'mùsica'. El fià el dovéa èssar suto, sensa spuaceto⁴. Infati, se la foja la fusse stà inumidìa da la saliva, no la gavarìa vibrà ben. Se podéa repèter la sofiada pi volte, finché la foja no la se funfignava⁵ o no la se slabrava. A foja sbrindelà, se se ne sercava n'altra e se riscuminsiava a zugar. Sol quando che nava zó el sole e se gera fata ora de nar a senar, se tornava casa felissi e contenti de èssarse ben svagà.