25           LE FRÌTOLE CO LA MARESINA

Có vivéo a Castelo de Arzegnàn (nel visentin alto), pena finìa la guera el magnar el scarsejava e tuto gera bon, anca el manco bon. Far le frìtole co la maresina¹, la gera na bona ocassion par inpienarse la baga² in quanto, co puchi schei, se se ne podéa cusinar on bel mucio. Servìa: farina bianca, on par de uvi, na presa de sale e sta ‘verdura’ inpastelà co aqua. El tuto el se friséa ne l’ojo, chel de semi, par sparagnar. Quando che me mama la dovéa pareciar calcossa da magnar, no essèndoghe gninte de mejo, la pensava de far sti dolseti e la me diséa: “Tonio, se te vè catar sù la maresina, te fasso le frìtole”. E mi, ciò, ghe navo de corsa. Girando par le siese, i strosi, le cavessagne de i canpi, quando ca catavo sgiavascari³ de sta erba, a ghin catavo sù finché a no gavéo inpienà la sporta. Rivà casa, tegnèndola ben alta, diséo: “Mama, eco la maresina. Vìdito quanta che la xe? Dai, fà le frìtole”. Ela la se metéa a oprar drio a pianete, a tece e a tuto el resto. Presto, de sóra de la tola, apariva na gran piana fumante, inpienà de saorìe frìtole. A sto punto me mama la ghe slargava parsora de i bei pissegoti de sùcaro e, co sta benedission, el tuto el diventava na finessa. I ga voja chei poareti, che no i ga vudo la fortuna de sajar ste ‘robetine’, de tacarse al vecio dito de la volpe furbeta, la qual, no rivando a sgranfignar el graspo de ua da la tiréla, la salvava la facia - no la pansa - disendo: “Nondum matura est!” ⁴ Luri, chei poareti pena mensonà, i disarìa: le spussa! Si si, i gavarà anca rason disendo che le spussa ma, a chei tenpi là, par noialtri tusiti, le frìtole co la maresina no le gera mai massa e le se mandava zó de strangolon, fin l’ùltima. Nel fondo de la piàdena, no restava gninte, gnanca la pi pìcola. Ansi, a chel che ghe tocava la picinina restà ùltima, el diséa brontolando: “Ma propio a mi, me dovéa tocar sta pètola?” ⁵