3   LE AMARENE DE ME NONA DRUSIANA^*

El ricordo ca stò par contarve el ga de pi de sinquanta ani e el fà parte de la me fanciulessa vissùa a Castèlo. Lì, in sto paese, a só stà fin a i me oto ani in quanto, a chel’età mia, se ga fato “san Martìn”¹ e se xe nà star in sità, a Arzegnàn. Mi co la me fameja stàvimo pena for de Porta Calavèna, me nona Drusiàna pena for de Porta Cisalpìna. Ste do porte, dotà de i so punti levatoi, ne i tenpi passà, i gera i du portali par intrar e nar for da la zona fortificà, la qual, desso, la xe on paese che el se ciama ‘Castelo’. I du passaji i gera cao e coa de l’úgnola² strada che la traversava, par longo, tuto el spassio proteto al de drento de i murajoni. Sti chì, a i tenpi sui, i gera alti alti e i gavéa i so merli e, anca, le buse par i arcieri. Tuto torno le mura, nel de drento, ghe jera el caminamento par la ronda e, a intervai regolar, stava le tori. Sóra el colmo pi alto ghe stava la roca, val dir el palasso paronal. Ne i tenpi pi tacà a i nostri, xe stà verto on gran varco butando zó on tòco de le mura de difesa. Sta nova entrada la servìa e, ancor la serve, da ingresso par la strada, che la vien zó da la parte alta, chela dita ‘el monte de San Matìo’. Nel tenpo d’istà, có faséa caldo ne le domèneghe e le altre feste drento la setemana, fra le tante bancarele in piassa, ghe stava, anca, el bancheto de me nona Drusiàna, che da tuti la jera ciamà ‘Zana’. Sóra de sto caretel, col pian de tole tegnù sù da du cavaleti, la Zana la faséa e la vendéa le amarene. Desso ve vojo contar de sto pìcolo esercissio de me nona. Parsora el pian del bancheto, ghe stava slargà na tovaja incerà³, pinturà a fiuri. Da na parte, a la manca, stava on gran tòco de giasso, ben squadrà. La nona la lo tegnéa senpre coerto co na canevassa⁴ linda, parché no ghe batesse sóra el sole. Dopo vignéa, missi in fila, i goti de luminio, in mezo ghe stava, in bela vista, le bosse de i dolsificanti, vegnéa drìo na caloma⁵ de altri goti de vèro col so manegheto e, par coa, a la drita, ghe stava la machineta par masenar el giasso. A i quatro cantuni de la pìcola tòla, sbordava le coche⁶ de la tovaja col so gran óro⁷. Lì sóto, ghe  stava a l’onbrìa, for da la pòlvare, via da le mosche e da le ave na mastela, drento la qual sgiossolava l’aqua, che la se faséa desfàndose  sia dal tòco de giasso grosso  sia da i tochetei fàtisi spacando co na mangareta⁸ el giasso. Fati a misura justa sti tocheti, i se ficava drento la boca del trapelo⁹ e, anca, i se strucava col mànego del coercio apòsito, che el gavéa la parte de drento tuta levra¹⁰ de spunciuni. L’inclinassion del pian co la so tovaja, la gera studià cussì da guidar i curiatolìti¹¹ de aqua propio drento el gran ressipiente. Drento sta mastela, la nona la gavéa za messo on par de seci de aqua neta, che la se rinovava slungàndose co chela che la scolava dal giasso siolto. In chel’aqua lì, la Zana la resentava, un par volta, i goti cussiché i jera senpre niti e, roba inportante, no se smissiava i gusti de i sughi. De sóra (messo de traverso rispeto a la mastela), ghe stava el tòco de giasso de sorapì. Có anca sto tòco el stava par finir, la Zana la faséa vegner, da l’omo incaricà, n’altra forma. Cussì on tòco novo el jera senpre pronto. Tuti i boce i se muciava¹², a graspo, torno sto banco e i se spintonava par rivarghe tacà. Anca mi me ficavo in mezo. Tegnendo in alto, ben streto fra i du déi el baioco, tuti i sigava che i voléa l’amarena. La nona, lora, la jera zòvane, piena de brio e la spessegava pi che la podéa. Somejava la gavesse quatro man. La machineta, parò, la gera una e pi de tanto giasso no la podéa masenar. Pena dà in man on bicer a on toso la ‘copiera’ la diséa: “A chi toca”? “Toca a mi”. “No xe vèro”. “El primo só mi”. Se se fusse stà in vinti, tuti i gavarìa sigà: “Toca a mi. El primo só mi”. Ne i àtimi de calca, calchedun el dava na man a la Drusiàna fasendo ruar, co la manòpola apòsita, la ruela de la machineta. (No ghe credarì, ma sto ‘marchingegno’ a lo go mi, ne la me casa a Roma e el fà la so bela mostra de sóra de na mènsola de on scafal). Ghe gera le amarene de tanti gusti: verde a la menta, bianco a la màndola o al coco, rosso (ma no me mensono de che cossa el fusse - fursi ribes? -). Mi, parò, toléo la me amarena senpre al gusto de tamarindo, color maron. La Zana, na volta fracà nel goto el giasso masenà, la lo tegnéa streto co na man e co chel’altra la roversava la bossa de la ‘spessialità’, tegnèndola col colo svoltà in zó. La bossa la gera tapà co on stròpolo de surlo¹³ fornìo de on tubeto de assal nichelà. La Drusiàna, dando scorluni, la faséa sgiossolar da sto bechéto sbiansi¹⁴ de siropo che, maciando i tocheti sgranà, el li incolorìa ben ben. Drento al goto la Zana la ghe ficava anca on cuciareto. Có tocava a mi me nona la dava on scorlon de pi e sto ato el intortegava¹⁵ on mormorìo: “Ciò, gheto visto? La fà la larga parché el xe so nevodo. Varda che mota la ghe ne ga dà!” Col so ‘trofeo’ ognun el nava nel posto bon par farse vèdar e, gustàndose la so amarena, el tirava sù col fià sforzà fasèndolo sigolar. Anca se faséa s-ciocar la lengua dosso el palà¹⁶, in segno de gran piasser. Dopo se nava far quatro passi in giro par la piassa e par gnente a se se netava la sbèssola¹⁷  macià. Infati la gera la prova de l’amarena magnà!