6          EL MANGO

La Maria, bela miciona rufianela, senpre a far ‘ron-ron’ torno de mi, la xe vignù a catarme anca oncò. Dopo i sòliti basi, abrassi, domande e risposte de rito, indove vai a cascar i so bei oci color verde aqua-marina? Varda ti, su du bei manghi che i spicava fra altra fruta ben guernà, in bela mostra, drento on sestin¹ de midolin de vìmini, posà al sentro de la tòla. La li varda co oci inmagà e sluseganti: “Che bei manghi! Indove li gheto mai catà? A mi no i me càpita mai, in man, cussì grossi, funfi, da far spetàcolo”. Mi digo, tanto par far el galante: “Ghin vuto uno?” Ela, vojosa, dubiosa, la dise de si ne l’arcan del so cor e ne la luse de i so oci incantà, parò, ben constumà, chel tantinel tìmida, col fià de la gola e la posission de la lengua la fà vin fora on ciaro: “Nò, grassie”! La risposta sonora la xe chela che la fà testo. Mi ciapo la ‘bala’ al volo pensando che, se sto fruto esòtico el resta a mi, mi me lo magno e no ela. Cussì fasso la parte del tonto e, anca se co la coa del me ocio ghe vedéo el bèco storto, a go scuminsià on altro discorso. Dopo che ela la xe nà de longo², me xe vignù de i scrùpoli e de i rimorsi de no gaver insistìo na s-cianta de pi parché la se ne ciapasse un e la se lo metesse ne la so borseta. A le volte basta cussì poco par far felisse na dona e sodisfar na bramosìa. Invesse nò, a ga vudo la mejo l’egoismo e l’avarissia!

Na bela figura de gnoco patoco³  a go fato par on mango!…