8                                                                                                                                       EL RÒCOLO DE ME NONO

Na roba che la me ga senpre piassa¹ e che la xe ben ciara ne i me ricordi la xe el ròcolo² de me nono. Sta postassion da la qual se trava³ col s-ciopo⁴ a i osei, la gera considerà la pi bela e la pi granda de la zona. Ela la se catava sóra el colmo de i so canpi. Èssar ciamà dal paron a nar a cassar drento l’oselanda, el gera tegnù on onor par i invità. A chei tenpi, gaver on ròcolo gera segno d’èssar siorasso! Pi volte a go visto che, có se montava sul discorso de sta costrussion, me nona la faséa la fassa felisse parché el ròcolo el gera on bel ricordo del so poro⁵ mario. El ròcolo el gera l’orgolio⁶ del Sior Toni! Có xe s-ciopà la guera, el nono el xe stà ciamà a le armi e no el xe pi tornà, lassando na vèdova e na fraca de fioi ne la desperassion. Pensé in che stato xe pionbà la fameja! Ricordo che a le volte, sbassà la vosse, la me contava robe no tanto bele e (calche volta la tirava for da la scarsela⁷ de la traversa⁸ on fassoleto par sugarse i oci) la diséa che la so pi granda preocupassion la gera qchela de dar a i fioi du menestri de late co na feta de polenta par sena. Ela la se servìa par ùltima. Se no se vansava gnente, la nava ne l'orto e la cavava sù na sèola o na ganba de ajo par senar. Ridendo la finìa: “Ma, tanto, vìdito ca ghe la go fata lo stesso a scanpar!” Sto parlando de i ani, che mi a go vissù on fià prima del milenovesentosinquanta. Mi la invojavo a contar altre robe e ela la nava vanti contàndome come tute le domèneghe el so omo el nava a trar a i osei col s-ciopo. “El se metéa dosso  el vestito da cassador, chel co le coste grosse de fustagno⁹, chel verde o chel maron. Le braghe¹⁰ le gera a la zuava¹¹, col sbofo e el gilè el gera tuto na scarsela par métarghe drento le cartuce, i toscani e la scatoleta de i fulminanti. Torno al colo, a la garibaldina, el tegnéa senpre on fassoleto par no onfegar¹² col suór el coleto de la camisa. Mèssose el capelo de pano, chelo co le falde larghe, el faséa la figura de on prìnsipe. Eh, Togneto mio, to nono el gera propio on gran  bel’omo”! El ròcolo el gera a du livei e, contando anca la cantina, i sarìa stà tri. Drento la càneva interà, al fresco, se tegnéa na botesela de vin moro e, sicome el sior Toni el gera on conpagnon, el stava senpre co la so conbrìcola de torno. Có i se sentìa strachi, i faséa on spuntin co grosse sberle¹³ de pan, fete de salado¹⁴ e goti de vin moro. Có scominsiava a farse scuro, tornà casa, el Toni el dava a la mojer¹⁵ i osei da spenar. La nona la me contava che, a forsa de tirar pene, ghe faséa mal el polso. Ma mi spessegavo¹⁶, sensa badar al male, la concludéa. Lo faséo volentiera parché sarìa vegnù drio na bona sena: spei de figà col rasedèlo¹⁷, rameti de osmarin, fetine de lardo, foje de oraro¹⁸, tocheti de carne de porco, foje de S. Antonio¹⁹ e i oseliti. El tuto ben infilzà ne i spei²⁰, che i sarìa stà girà col menarosto²¹, chelo mosso da la susta de assal. Pena de sóto de i spei, ne la parte in vanti propio tacà tacà, ghe stava la lecarda e lì, nel tocio del grasso che el sgiossolava da le carni infilzà, se brustolava le fete de polenta. La sera la se concludéa co gran cantade. Torno al ròcolo ghe stava inpiantà tanti àlbari. Par mascherar la costrussion, a óro²² tera e tuto torno via a i muri, ghe stava le russe²³, i periti²⁴, i brónboi²⁵, le rose canine²⁶, i nespolari²⁷, le cornaciare²⁸ e altre piante salbeghe. Coerzéa el ròcolo tante piante de mezo fusto e altre de alto fusto. I osei volando in alto, fursi, i se diséa inmagà: “Orpetina, che paradiso terestre!” Puariti, i sarìa ben presto finìi rostìi al spéo! Se catava, anca, on gran figàro, che, a fighi mauri, el gera na tentassion e no sol par i becafighi! I muri del ròcolo i gavéa tanti busi picinini e scunti. Paréa come se, lì, ghe mancasse on sasso moro. Invesse, lì, ghe stava ben postà la cana de la s-ciopa. Noialtri tusi de l’intiera contrà, se nava in sto posto, quando che el stava verto, par zugar. Par el pi tenpo, parò, la portesela la stava inciavà. Drento se tegnéa rancurà i atressi par i canpi. Costruìo nel punto pi alto del fondo²⁹, sta costrussion la diventava, par i osei de passajo, on bel posto e i se calava zó vuto par sponsarse, vuto par becolar calcossa. Chissà in che stato el ròcolo el xe messo desso! Fursi³⁰, come par tante altre robe bele viste e vissùe ne la me fanciulessa, sarà mejo ca me contenta de imaginàrmelo solo ne la me memoria, belo come a i tenpi andà!…