10        LE MASSELE DEI MASCI

_Che mota de ricordi tristi e de ricordi bei, sti chì e anca cheli aromai passà. I xe, parò, vivi ne la me memoria: gente, robe, loghi, animai, piante, fiuri, coluri¹ , léchi² , parfumi, mùsiche, amori e delusion! A go vudo na educassion senplisse, paesana, relijosa. Gente e situassion de vita, esenpi, diti, contati, instrussion, modi de dir e de far, el tuto senpre noando ne la senplissità, sensa sogni de comando e de richesse. Sbisigando³ ne la me memoria vardè, desso, cossa che me xe vegnù inamente⁴ , come sa gavesse strucà el boton⁵ de la television: le massele de i mas-ci! I puareti (i porsei), che i xe stà copà a so tenpo par far saladi⁶ , museti⁷ , cincionele⁸ ec., i xe sopravissùi a la so morte corporal ne la testimonianza de le so ganasse, rancurà, co gran  scrùpolo, da i òmeni, ne i posti ventilà e suti. De sóto del pòrtego de la casa de me nona, se tegnéa de tuto e, soratuto, ben rancurà i atressi che i servìa pa’ i canpi. I dovéa star al suto, al cuerto, sóto ocio e, cussì ben presservà, i podesse durar par pi tenpo. Fra la fraca de robe pìcole e grandi posà par tera o inciodà a i muri, picà via a i travi o a i traviti del solaro del pòrtego, ghe stava na bela sfilsa de ganasse⁹ de i porsei, che le pensolava, bianche incandìe scanà, co la so bela fila de denti, in bela monstra. Le dondolava ligà sù co on fil de spago e le dindolava quando che tirava le folà¹⁰ de vento. Le faséa inpression! Tuti i bacanoti¹¹ e i contadini, i le tegnéa rancurà zelosamente, parché coréa come verità sacrossanta che, la mególa¹² de i ossi del mas-cio, la fasesse miràculi. Sta roba particolar, la gerà tegnù in conto de èssar, se no l’ùnica, almanco la mejo medessina par, quando che calchedun el se macava de bruto e el roan de la macaura el deventava de color rosso-canónico o viola-scuro, quasi moro par el sangue pestà e no ’l nava mai via. Cussì, quando che gera necessario, se ronpeva, col martelo grosso, na gràmola¹³ de on porselo. Se raspava for, co cura, la mególa, che la se molava¹⁴ co na sculierà¹⁵ de ojo bon stiepidà e se spalmava, pian pianelo, sta medessina sóra la parte macà. Dopo se faséa on inpaco drento na pessa (de sòlito se doprava on tòco de ninsolo¹⁶ sbregà) e se tegnéa tuto ben fermà co na garza o on cìnciolo¹⁷ girà torno pi volte e fermà co on gropo a àsola. Prima copà el porsel, dopo magnà i parsuti e le lugàneghe, ancor pi dopo spacà la massela e ontà la parte malà, al porocristian macà no ghe restava altro se no de spetar, co santa passiensa, che el tenpo ‘bon dotor’ el fasesse el so corso natural fin al tenpo de la guarijon, sognando, intanto, de métar na ganassa nova de trinca int’el vodo de chela vecia, aromai del tuto fruà.