14        LA CASSA DE SORAVIA

Int’el salon de la me casa de canpagna, a Corchian¹ , fà la so bela figura la càssa² che me opà³ el ga portà in sorapì de la dota, cussì come se constumava de portar, lora, par tradission. La tegno rancurà pi par afeto che par valor. Infati, ela la me recorda, senpre, el sposalissio de luri. No cognosso ben come se spartìa le robe: i stramassi, i ninsui, le coerte, le reti, le speràngole⁴ del lèto, l’armaron, l’armaro, i bufeti ec. (quai che tocava a l'omo e quai che tocavaa la dòna). Se no sbalio, me par che calcossa tocasse da dar, anca, a i conpari. Me popà el gera on marangon⁵ fine⁶ e, cussì, el ga podesto far par regalo, in sorapì de la dota de usansa, na bela cassa de legno de piopa⁷ col so coercio a rabaltela. La gera fornìa de la so seradura col scroco a giro dupio. Me popà el gera on artista nel so laoro e, sicome el legno el gera de poco valor, elo el lo ga pinturà co de i penei apòsiti dropando de la vernisa de du coluri: maron ciaro e maron scuro. A la fin, l’ocio el vedéa ben risaltà de le nervaure cussì ben fate che le somejava a chele de legno bon. Tuta la fameja la xe nà vanti, par na vita, co la dota del 'bianco' rancurà drento sta cassa. Passà e canbià i tenpi, quando che xe rivà l'ora de spartìr l'eredità, drento sta cassa se ga catà, fra le tante altre robe messe in bel’òrdine, le fasse par i infanti. Ste chì le gera ricamà e le gera de color rosa e azuro. Le  gera parà torno de fisso e sti panesei i voléa èssar on regalo, che la ‘nona Aneta’ la gavéa pensà de lassar par tirar sù ben i so nevodeti. A chei tenpi se constumava fassar, co pi giri, le ganbete e tuto el corpeselo de i puteleti. Tute le comari e le levatrici le racomandava, a le zòvani mame, de fassar ben strete le creature parché, da grandi, le gavesse le ganbe drite. Tante volte passo arente a sto caro mòbile e có calche volta lo verzo (parché lo dòpro), me vien inamente i tenpi de mi boceta e vedo la mama vèrzarlo co i so caveji mori mori (petenà a cocon, ben rancurà de de drio de la so testa) e co i so oci bei come el sol!